अमरावतीत तीन नवजात बालकांचा होरपळून मृत्यू

अमरावतीमधील आजच्या दुर्घटनेमुळे मी खूप दुःखी आहे. दगावलेल्या नवजात बालकांना अतिशय व्यथित अंतःकरणाने श्रद्धांजली अर्पण करतो. त्यांच्या पालकांना हे दुःख सहन करण्याची ताकद ईश्वर देवो, अशी प्रार्थना करतो. या घटनेच्या संपूर्ण चौकशीचे आदेश मी दिले आहेत. जे जखमी झाले त्यांच्यावर उपचार सुरू आहेत. त्यांना सर्व प्रकारची वैद्यकीय सहायता दिली जात आहे. मृत बालकांच्या नातेवाईकांच्या पाठीशी सरकार उभे असून, सरकार व प्रशासन संपूर्ण मदत करत आहे. मी जिल्हा प्रशासनाच्या सतत संपर्कात असून, आवश्यक त्या सर्व सूचना दिल्या आहेत. प्रशासन पूर्णपणे लक्ष ठेवून आहे. अधिकाऱ्यांशी याबाबत चर्चा केली. आगीचे नेमके कारण अजून समजू शकलेले नाही, अशी प्रतिक्रिया राज्याचे महसूल मंत्री तथा जिल्ह्याचे पालकमंत्री चंद्रशेखर बावनकुळे यांनी दिली.

 

घटनेची माहिती मिळताच माजी मंत्री यशोमती ठाकूर, डॉ. सुनील देशमुख यांच्यासह अन्य काँग्रेसचे नेते रुग्णालयात पोहोचले. त्यांनी आग लागलेल्या अतिदक्षता कक्षाची पाहणी केली. संबंधित जबाबदार व्यक्तींची संवाद साधला. रुग्णालयाच्या फायर ऑडिटवर त्यांनी आक्षेप घेतला. या संपूर्ण प्रकरणाची सखोल चौकशी करून फायर ऑडिट आणि अग्निसुरक्षा व्यवस्थेबाबत वस्तुस्थिती जनतेसमोर आणावी, अशी मागणी यशोमती ठाकूर यांनी केली.

जिल्हा स्त्री रुग्णालयाच्या जुन्या इमारती तीन वर्षांपूर्वी नवजात बालकांच्या अतिदक्षता विभागात अशीच आग लागल्याची घटना घडली होती. त्यातही काही बालकांचा मृत्यू झाला होता. त्यानंतरच नवीन इमारत उभारण्याचा निर्णय झाला. आज तीन वर्षानंतर नव्या इमारतीतही तशीच घटना घडून पुनरावृत्ती झाली आहे.

जिल्हा स्त्री रुग्णालयातील घटना अत्यंत दुर्दैवी आहे. मुख्यमंत्र्यांनी आवश्यक तो निधी तातडीने देऊन ही इमारत उभी झाली. येथे सर्व अत्याधुनिक सुविधा असतानाही अशी घटना होणे म्हणजे संबंधित अधिकाऱ्यांचे व्यवस्थेकडे अजिबात लक्ष नव्हते असा त्याचा अर्थ होतो. वेळोवेळी आढावा घेताना कोणी त्रुटी असल्याचे सांगितले नाही. या घटनेची सखोल चौकशी करून संबंधित अधिकाऱ्यांवर, कर्मचाऱ्यांवर कठोर कारवाई करावी अशी मागणी आमदार रवी राणा यांनी केली.