जिल्हाधिकाऱ्यांच्या कक्षात ‘मृतदेह’
वनविभागाचे प्रकरण : संबंधितांवर कारवाईची मागणी
Total Views |
यवतमाळ
yavatmal,forest department सामाजिक वनीकरण विभागातील कंत्राटीपदावरील कर्मचाऱ्याने आत्महत्या केली. मृत कर्मचारी रमाकांत शुक्ला यांचा मृतदेह घेऊन नातेवाईकांनी न्याय मिळावा, या मागणीसाठी सोमवार, २४ ऑगस्ट रोजी जिल्हाधिकारी विकास मीना यांच्या कक्षात मृतदेह आणून ठेवल्याने काही काळ तणावाचे वातावरण निर्माण झाले होते.
आत्महत्येपूर्वी रमाकांत शुक्ला यांनी लिहिलेल्या चिठ्ठीत वनविभागातील कामकाजासह काही अधिकारी व कर्मचाऱ्यांवर गंभीर आरोप केला आहे. त्यामुळे नातेवाईकांनी आक्रमक भूमिका घेत मृतदेह जिल्हाधिकाऱ्यांच्या कक्षात ठेवला होता. घटनेची माहिती होताच शहर पोलिस ठाण्यातील पोलिसांनी जिल्हाधिकारी कार्यालयात धाव घेतली.
नातेवाईकांकडून उपजिल्हाधिकारी अनिरुद्ध बक्षी यांना निवेदन देण्यात आले. शिवाय आत्महत्या करण्यापूर्वी लिहिलेल्या चिठ्ठीत काही वनअधिकारी, आरएफओ तसेच संबंधित कर्मचाऱ्यांच्या भूमिकेबाबतही प्रश्न उपस्थित करण्यात आला आहे.आत्महत्येपूर्वीच्या या चिठ्ठीत करण्यात आलेल्या आरोपांची निष्पक्ष चौकशी करून संबंधितांवर कायदेशीर कारवाई करावी, अशी मागणी नातेवाईकांकडून करण्यात आली आहे.
प्रशासनाच्या आश्वासनानंतर मृतदेह नेला
आत्महत्यापूर्व चिठ्ठीत वनमजुरांना शासन नोकरीत कायम करण्याचा विषय होता, प्रशासनाकडून उपजिल्हाधिकारी अनिरुद्ध बक्षी यांनी वेळीच दखल घेऊन नातेवाईकांशी संवाद साधला. प्रशासनाकडून तत्काळ कारवाईचे आश्वासन मिळाल्यानंतर मृतदेह परत नेण्यात आला.