शहबाजच्या अष्टपैलू खेळीने ईस्ट झोनचा धमाका!

shahbazs all round display दुलीप ट्रॉफी २०२६ मधील पहिल्या उपांत्यपूर्व सामन्यात ईस्ट झोनने नॉर्थ ईस्ट झोनचा एक डाव आणि २१० धावांनी दणदणीत पराभव करत उपांत्य फेरीचे तिकीट निश्चित केले. ईस्ट झोनच्या या मोठ्या विजयाचा केंद्रबिंदू ठरला तो ३१ वर्षीय अष्टपैलू शहबाज अहमद. फलंदाजीत दमदार शतक झळकावण्यासोबतच त्याने दोन्ही डावांत प्रत्येकी चार बळी घेत संघाच्या विजयात मोलाची भूमिका बजावली. या कामगिरीसाठी त्याला सामनावीर पुरस्काराने गौरवण्यात आले.

 

 

बंगळूरुतील सेंटर ऑफ एक्सलन्स येथे झालेल्या या सामन्यात ईस्ट झोनने प्रथम फलंदाजी करताना मोठी धावसंख्या उभारली. मात्र, संघातील वैभव सूर्यवंशी आणि इशान किशन यांच्याकडून अपेक्षित योगदान मिळाले नाही. वैभवने ६ चेंडूंत ८ धावा केल्या, तर इशानला ९ चेंडूंत केवळ ४ धावाच करता आल्या. त्यानंतर सुदीप कुमार घरामी आणि शहबाज अहमद यांनी डावाची सूत्रे हाती घेत शानदार शतके झळकावली.

 

सुदीप कुमारने १८५ चेंडूंचा सामना करत २५ चौकार आणि एका षटकाराच्या मदतीने १४६ धावांची आक्रमक खेळी केली. दुसऱ्या बाजूला शहबाज अहमदने संयमी तसेच प्रभावी फलंदाजी करत २४४ चेंडूंत १७ चौकार आणि ४ षटकारांसह १६७ धावा फटकावल्या. कुमार कुशाग्रनेही ५५ धावांचे योगदान दिले. या फलंदाजांच्या जोरावर ईस्ट झोनने पहिल्या डावात ४६७ धावांचा डोंगर उभा केला.

 

या मोठ्या धावसंख्येचा पाठलाग करताना नॉर्थ ईस्ट झोनची फलंदाजी पूर्णपणे ढासळली. त्यांचा पहिला डाव अवघ्या १११ धावांवर आटोपला. त्यामुळे ईस्ट झोनने त्यांना फॉलोऑन दिला. दुसऱ्या डावातही नॉर्थ ईस्ट झोनच्या फलंदाजांना मोठी भागीदारी करता आली नाही आणि संपूर्ण संघ १४६ धावांवर गारद झाला. फिरोजिम जोतिनने ३९ धावा करत दुसऱ्या डावात संघाकडून सर्वाधिक धावा केल्या.

 

गोलंदाजीत ईस्ट झोनकडून अनुकूल रॉयने सर्वाधिक पाच बळी घेतले. वैभव सूर्यवंशीनेही गोलंदाजी करताना तीन षटकांत दोन विकेट मिळवल्या. मात्र, सामन्यातील सर्वाधिक प्रभावी अष्टपैलू कामगिरी शहबाज अहमदची ठरली. त्याच्या फलंदाजी आणि गोलंदाजीतील योगदानामुळे ईस्ट झोनने तब्बल एक डाव आणि २१० धावांनी विजय मिळवत दुलीप ट्रॉफीच्या उपांत्य फेरीत दिमाखात प्रवेश केला.