राम रहीमला पुन्हा २१ दिवसांचा पॅरोल!

Ram Rahim granted parole डेरा सच्चा सौदाचा प्रमुख गुरमीत राम रहीम याला हरियाणा सरकारकडून आणखी २१ दिवसांचा पॅरोल मंजूर करण्यात आला आहे. पॅरोलची परवानगी मिळाल्यानंतर राम रहीम मंगळवारी सकाळी ६:०५ वाजता रोहतक येथील सुनारिया तुरुंगातून आपल्या ताफ्यासह सिरसा येथील आश्रमाच्या दिशेने रवाना झाला. यावेळी त्याला सिरसा येथील मुख्य डेरा सच्चा सौदा आश्रमात जाण्याची परवानगी देण्यात आली आहे.राम रहीमला सिरसा आश्रमात जाण्याची परवानगी मिळण्याची ही सलग तिसरी वेळ आहे. तुरुंगातून बाहेर पडण्याची ही त्याची १७ वी वेळ असल्याचे सांगण्यात आले आहे. यापूर्वी पॅरोल किंवा फर्लोच्या काळात त्याला उत्तर प्रदेशातील बागपत जिल्ह्यातील बरनावा आश्रमात ठेवण्यात आले होते. मात्र, यावेळी तो सिरसा येथील मुख्य डेरा सच्चा सौदा आश्रमात जाणार आहे.

 

 

 

राम रहीमला दोन साध्वींवरील बलात्कार आणि डेरा सच्चा सौदाचे माजी व्यवस्थापक रणजित सिंग यांच्या हत्या प्रकरणात २०१७ मध्ये दोषी ठरवण्यात आले होते. त्याला २० वर्षांच्या तुरुंगवासाची शिक्षा सुनावण्यात आली असून तो गेल्या १० वर्षांपासून कारागृहात आहे. पत्रकार रामचंद्र छत्रपती यांच्या हत्या प्रकरणातही त्याला दोषी ठरवण्यात आले आहे.मात्र, या कालावधीत राम रहीमला आतापर्यंत १६ वेळा पॅरोल किंवा फर्लोच्या माध्यमातून तुरुंगाबाहेर येण्याची संधी मिळाली आहे. यापूर्वी मे महिन्यात त्याला ३० दिवसांचा पॅरोल मंजूर करण्यात आला होता. आता पुन्हा २१ दिवसांची तात्पुरती सुटका करण्यात आली आहे.

 

 

नियमांनुसार, तुरुंगवासाची शिक्षा भोगणाऱ्या कैद्यांना विशिष्ट परिस्थितीत पॅरोल मंजूर केला जाऊ शकतो. मात्र, राम रहीमला वारंवार पॅरोल किंवा फर्लो मिळत असल्याने त्याच्या प्रकरणाची अनेकदा चर्चा झाली आहे. त्याच्या प्रत्येक तात्पुरत्या सुटकेनंतर राजकीय तसेच सार्वजनिक पातळीवर प्रश्न उपस्थित झाले आहेत. ताज्या २१ दिवसांच्या पॅरोलमुळे पुन्हा एकदा उच्च-प्रोफाइल कैद्यांना पॅरोल देण्याच्या धोरणावर लक्ष केंद्रित झाले आहे.