लॉर्ड्स कसोटीआधी बाबरचा ‘कमबॅक’ संकेत!

babar hints at a comeback इंग्लंडविरुद्धच्या पहिल्या कसोटीत दारुण पराभव झाल्यानंतर पाकिस्तान संघासाठी लॉर्ड्स कसोटीपूर्वी दिलासादायक बातमी समोर आली आहे. संघाचा स्टार फलंदाज आणि कसोटी कर्णधार बाबर आझम बोटाच्या दुखापतीतून सावरण्याच्या मार्गावर असून त्याने २५ ऑगस्ट रोजी लॉर्ड्सवर नेट्समध्ये सराव केला. वेगवान तसेच फिरकी गोलंदाजांचा सामना करत त्याने संपूर्ण फलंदाजी सत्र पूर्ण केले. त्यामुळे २७ ऑगस्टपासून सुरू होणाऱ्या दुसऱ्या कसोटीत बाबरच्या पुनरागमनाच्या आशा वाढल्या आहेत.

 

 

वेस्ट इंडिज दौऱ्यात बाबरच्या बोटाला दुखापत झाली होती. त्यानंतर बेकेनहॅम येथे झालेल्या सराव सामन्यात ही दुखापत आणखी वाढल्याने त्याला लीड्समध्ये इंग्लंडविरुद्धच्या पहिल्या कसोटीत खेळता आले नव्हते. मात्र, आता त्याच्या प्रकृतीत सुधारणा होत असून लॉर्ड्स कसोटीसाठी तो उपलब्ध होण्याची शक्यता निर्माण झाली आहे. पाकिस्तानचे गोलंदाजी प्रशिक्षक उमर गुल यांनी बाबरच्या सरावाबाबत सकारात्मक माहिती दिली. बाबरने नेट्समध्ये वेगवान गोलंदाज, फिरकी गोलंदाज आणि थ्रोडाउन्सचा सामना केला तसेच संपूर्ण फलंदाजी सत्र पूर्ण केले. तो चांगल्या लयीत दिसत असून सामन्यासाठी उपलब्ध होईल, अशी आशा असल्याचे गुल यांनी सांगितले.

पहिल्या कसोटीत बाबरच्या अनुपस्थितीचा पाकिस्तानच्या फलंदाजीवर परिणाम झाला. लीड्समध्ये झालेल्या सामन्यात इंग्लंडने पाकिस्तानचा एक डाव आणि १०३ धावांनी पराभव केला. त्यामुळे तीन सामन्यांच्या मालिकेत इंग्लंडने १-० अशी आघाडी घेतली आहे. अशा परिस्थितीत बाबरचे संघात पुनरागमन पाकिस्तानसाठी महत्त्वाचे मानले जात आहे. इंग्लंडच्या भूमीवर बाबर आझमची कामगिरीही लक्षवेधी आहे. त्याने इंग्लंडविरुद्ध सहा डावांमध्ये तीन अर्धशतके झळकावली असून त्याची फलंदाजीची सरासरी ६५.७५ आहे. एकूण इंग्लंडविरुद्धच्या १४ कसोटी डावांत बाबरने सहा अर्धशतके आणि एका शतकासह ५३.८३च्या सरासरीने धावा केल्या आहेत.

 

वेस्ट इंडिजविरुद्धच्या मागील कसोटी मालिकेतही बाबर पाकिस्तानचा सर्वाधिक धावा करणारा फलंदाज ठरला होता. त्याने दोन अर्धशतकांच्या मदतीने १९३ धावा केल्या होत्या. त्यामुळे लॉर्ड्स कसोटीसाठी तो तंदुरुस्त ठरल्यास पाकिस्तानच्या फलंदाजीला मोठा आधार मिळू शकतो. इंग्लंड आणि पाकिस्तान यांच्यातील दुसरी कसोटी २७ ते ३१ ऑगस्टदरम्यान लॉर्ड्सवर खेळवली जाणार आहे. मालिकेतील तिसरा आणि अंतिम सामना ९ ते १३ सप्टेंबरदरम्यान एडजबॅस्टन येथे होणार आहे.