प्रीती झिंटाने दिलेल्या २ कोटींच्या कर्जावरून वाद

preity zinta rs 2 crore loan case ‘पाकीजा’ आणि ‘मुघल-ए-आझम’ यांसारख्या गाजलेल्या हिंदी चित्रपटांचे ज्येष्ठ निर्माते कमल अमरोही यांच्या कुटुंबावर कठीण काळ ओढवला असताना अभिनेत्री प्रीती झिंटाने मदतीचा हात पुढे केल्याचे सांगितले जाते. प्रीती झिंटाने कमल अमरोही यांचा मुलगा शानदार अमरोही यांना २ कोटी रुपये कर्जाच्या स्वरूपात दिले होते. मात्र, ही रक्कम अद्याप परत करण्यात आलेली नसल्याचा दावा करण्यात आला आहे. त्यामुळे अनेक वर्षांपूर्वी झालेला हा आर्थिक व्यवहार पुन्हा चर्चेत आला आहे.

 

 

या प्रकरणाची न्यायालयीन लढाई अनेक वर्षांपासून सुरू असून, प्रकरण अद्याप न्यायालयात प्रलंबित आहे. आता कमल अमरोही यांचा मुलगा ताजदार अमरोही यांनी या प्रकरणावर प्रतिक्रिया दिली आहे. आपल्या भावावर करण्यात आलेल्या आरोपांवर भूमिका मांडताना त्यांनी प्रीती झिंटाने दिलेल्या पैशांचा ठोस पुरावा काय आहे, असा सवाल उपस्थित केला. मात्र, या प्रकरणातील आरोप आणि दावे न्यायालयीन प्रक्रियेत असल्याने त्यावर अद्याप अंतिम निष्कर्ष निघालेला नाही.

ताजदार अमरोही यांनी विकी लालवाणी यांच्या यूट्यूब वाहिनीवरील मुलाखतीत या प्रकरणावर भाष्य केले. त्यांच्या म्हणण्यानुसार, प्रीती झिंटाने शानदार अमरोही यांना पैसे दिल्याचा दावा केला असून आता ती रक्कम परत मागत आहे. यावर ताजदार यांनी अनेक प्रश्न उपस्थित केले. शानदार जिवंत असताना पैशांची मागणी का करण्यात आली नाही आणि त्यांच्या निधनानंतरच हा दावा का करण्यात आला, असा सवाल त्यांनी केला. प्रत्यक्ष पैसे दिले असतील तर त्याची पावती, व्यवहाराची नोंद किंवा अन्य कोणता पुरावा आहे का, असेही त्यांनी विचारले. तसेच, “पैसे नेमके कोणाला दिले?” असा प्रश्न उपस्थित करत त्यांनी या दाव्याच्या पुराव्याबाबत शंका व्यक्त केली.२ कोटी रुपयांच्या कर्जाच्या व्यवहाराबरोबरच प्रीती झिंटा आणि शानदार अमरोही यांच्यात सुमारे ६०० कोटी रुपयांच्या मालमत्तेवरूनही वाद असल्याचे सांगितले जाते. शानदार अमरोही यांनी एकदा प्रीती झिंटाला आपली दत्तक मुलगी म्हटल्याचा उल्लेखही या प्रकरणात केला जातो.शानदार अमरोही आपल्या मालमत्तेतील काही हिस्सा प्रीती झिंटाच्या नावावर करण्यासाठी मृत्युपत्र तयार करणार असल्याची चर्चा होती. तसेच तिला ‘महल पिक्चर्स’ची संचालक बनवण्याची योजना असल्याचेही दावे करण्यात आले होते. मात्र, प्रीती झिंटाने हे दावे फेटाळून लावले होते.

दरम्यान, ६०० कोटी रुपयांच्या मालमत्तेच्या दाव्यावरही ताजदार अमरोही यांनी स्पष्टीकरण दिले. कमल स्टुडिओ विकण्याची चर्चा सुरू असताना शानदार अमरोही यांचा हिस्सा ६०० कोटी रुपये असल्याची चर्चा होती आणि हा हिस्सा प्रीती झिंटाला दिला जाणार असल्याचे सांगितले जात होते. मात्र, प्रत्यक्षात ६०० कोटी रुपयांची अशी कोणतीही मालमत्ता अस्तित्वात नव्हती, असे ताजदार यांनी मुलाखतीत स्पष्ट केले.

शानदार अमरोही यांनी प्रीती झिंटाला दत्तक घेतले नव्हते, त्यामुळे तिला मालमत्ता देण्याचा प्रश्नच निर्माण होत नाही, असेही ताजदार यांनी सांगितले. त्यांच्या म्हणण्यानुसार, शानदार हे प्रीती झिंटाचे चाहते होते आणि ते तिला अनेकदा महागड्या भेटवस्तू पाठवत असत. त्यांनी अभिनेत्रीला शीतकपाट आणि घड्याळ यांसारख्या मौल्यवान वस्तू भेट दिल्या होत्या. प्रीती झिंटालाही त्यांच्याबद्दल फारशी माहिती नव्हती, असे ताजदार यांनी म्हटले.

दुसरीकडे, शानदार अमरोही यांच्या निधनानंतर प्रीती झिंटाने त्यांना दिलेल्या पैशांची व्याजासहित परतफेड करण्याची मागणी केली होती. २०१३ मध्ये तिने मुंबई उच्च न्यायालयात खटला दाखल केला. या दाव्यात तिने शानदार अमरोही यांना २ कोटी रुपये कर्ज म्हणून दिल्याचे म्हटले होते; ही रक्कम भेट किंवा दान म्हणून दिलेली नव्हती, असा तिचा दावा होता. प्रीती झिंटाच्या म्हणण्यानुसार, त्यावेळी शानदार अमरोही आर्थिक आणि कायदेशीर अडचणींचा सामना करत होते. त्यांनी तिच्याकडे आर्थिक मदत मागितली होती आणि परिस्थिती सुधारल्यानंतर ही रक्कम परत करण्याचे आश्वासन दिले होते.