तिबेट-नेपाळ सीमेवर पुन्हा तलाव फुटला!

lake has burst again onTibet-Nepal borde तिबेट-नेपाळ सीमेवर पुन्हा एकदा तलाव फुटल्याने परिसरातील परिस्थिती गंभीर बनली आहे. तिबेटच्या दिशेने पाण्याचा प्रवाह पुन्हा सुरू झाल्याची माहिती समोर आल्यानंतर चीनने केरुंग परिसरात सुरू असलेले बचाव आणि मदतकार्य तात्पुरते थांबवले आहे. अचानक निर्माण झालेल्या या परिस्थितीमुळे बचावकार्य करणाऱ्या पथकांसह स्थानिक नागरिकांच्या सुरक्षेचा प्रश्न निर्माण झाला आहे. संभाव्य धोका लक्षात घेऊन घटनास्थळापासून किमान १ किलोमीटर अंतरावर जाण्याच्या सूचना देण्यात आल्या आहेत.चीनच्या सरकारी माध्यमांनी दिलेल्या माहितीनुसार, तिबेट-नेपाळ सीमेवरील तलाव पुन्हा फुटल्याने मोठ्या प्रमाणात पाणी तिबेटच्या दिशेने वाहू लागले आहे. यामुळे केरुंग येथे बचाव आणि मदतकार्य करणाऱ्या पथकांना तातडीने मागे हटण्यास सांगण्यात आले. परिस्थितीचा धोका लक्षात घेता बचाव पथकांनी घटनास्थळापासून सुरक्षित अंतर राखावे, असे निर्देश देण्यात आले आहेत. त्यामुळे सुरू असलेल्या मदतकार्यात काही काळासाठी अडथळा निर्माण झाला आहे.

 

 

 

 

या घटनेनंतर नेपाळमध्येही प्रशासनाकडून सतर्कतेचा इशारा देण्यात आला आहे. नेपाळ पोलिसांनी नागरिकांसह बचाव आणि मदतकार्यात सहभागी असलेल्या सर्व सुरक्षा कर्मचाऱ्यांना परिस्थितीवर बारकाईने लक्ष ठेवण्याचे आवाहन केले आहे. तिबेटच्या बाजूला असलेले धरण पुन्हा फुटल्याचे वृत्त मिळाल्याचे पोलिसांनी सांगितले. त्यामुळे पाण्याचा प्रवाह वाढण्याची शक्यता लक्षात घेऊन धोकादायक भागापासून दूर राहण्याच्या सूचना देण्यात आल्या आहेत.नेपाळ पोलिसांनी जारी केलेल्या सूचनेनुसार, बचावकार्य करणारे सुरक्षा कर्मचारी, बचाव पथके आणि मदतकार्यात सहभागी नागरिकांनी तातडीने सुरक्षित ठिकाणी जावे. तसेच परिस्थितीची माहिती परिसरातील इतर नागरिकांपर्यंत पोहोचवावी, असे आवाहन करण्यात आले आहे. अचानक वाढलेल्या पाण्यामुळे बचावकार्य करणाऱ्यांनाही धोका निर्माण होऊ शकतो, त्यामुळे सुरक्षेला प्राधान्य देण्याच्या सूचना देण्यात आल्या आहेत. तिबेट-नेपाळ सीमेवरील या घटनेमुळे आधीच संकटग्रस्त भागातील परिस्थिती आणखी बिकट होण्याची चिंता व्यक्त केली जात आहे. तलाव पुन्हा फुटल्याने पाण्याचा प्रवाह कोणत्या भागाकडे आणि किती वेगाने वाढतो, यावर प्रशासनाचे लक्ष आहे. दरम्यान, चीन आणि नेपाळकडून नागरिकांना सतर्क राहण्याचे तसेच प्रशासनाच्या सूचनांचे पालन करण्याचे आवाहन करण्यात आले आहे.