बिगबास्केट, झेप्टो, ब्लिंकइटवर मिळणार केवळ २ ते ३ किलो साखर!

3 kg of sugar available on bigbasket सणासुदीच्या काळात साखरेच्या दरात वाढ होत असताना ग्राहकांना आता आणखी एका बदलाला सामोरे जावे लागत आहे. वाढत्या किमतीच्या पार्श्वभूमीवर काही ऑनलाइन किराणा आणि क्विक कॉमर्स प्लॅटफॉर्मवर साखर खरेदीच्या प्रमाणावर मर्यादा लागू करण्यात आली आहे. झेप्टो, ब्लिंकइट आणि स्विगी इन्स्टामार्टसारख्या प्लॅटफॉर्मवर काही ब्रँडच्या साखरेची एकावेळी ठरावीक प्रमाणापेक्षा जास्त खरेदी करता येणार नाही. काही ठिकाणी ही मर्यादा २ किलो, तर काही उत्पादनांसाठी ३ किलोपर्यंत असल्याची माहिती आहे.

 

 

उपलब्ध माहितीनुसार, ही मर्यादा सर्व कंपन्यांसाठी किंवा सर्व भागांत समान नाही. साखरेचा ब्रँड, पॅकचा आकार, ॲप आणि संबंधित भागातील उपलब्ध स्टॉक यानुसार खरेदीची मर्यादा बदलत आहे. स्विगी इन्स्टामार्टवर काही ब्रँडच्या साखरेच्या दोन पाकिटांपर्यंत किंवा एकूण २ किलोपर्यंत ऑर्डर करता येत आहे. ब्लिंकइटवर काही पॅकच्या खरेदीवर मर्यादा असून, एका ब्रँडचा केवळ एक ३ किलोचा पॅक घेण्याची परवानगी असल्याची माहिती आहे.

 

झेप्टोवरही काही ब्रँडसाठी एका २ किलोच्या पॅकपर्यंत खरेदी करता येत असल्याचे समोर आले आहे. त्यामुळे ग्राहकांना मोठ्या प्रमाणात साखर एकाच वेळी खरेदी करता येत नाही. मात्र, ही मर्यादा प्रत्येक उत्पादनासाठी लागू आहेच असे नाही. संबंधित प्लॅटफॉर्मवरील ब्रँड आणि उपलब्ध स्टॉकनुसार नियम बदलत असल्याचे सांगण्यात आले आहे.दरम्यान, बिगबास्केटवरही काही भागांत वेगळी स्थिती पाहायला मिळत आहे. दिल्ली-एनसीआरमधील काही भागांत काही ब्रँडच्या साखरेची सहा पाकिटांपर्यंत खरेदी करण्याची परवानगी असल्याची माहिती आहे. त्यामुळे साखर खरेदीवरील ही मर्यादा देशभर लागू करण्यात आलेला कोणताही एकसमान सरकारी निर्बंध नसल्याचे स्पष्ट होते.

 

सणासुदीच्या काळात साखरेची मागणी वाढत असतानाच दरही वाढले आहेत. अशा परिस्थितीत ग्राहकांकडून मोठ्या प्रमाणावर साखरेचा साठा केला जाऊ नये आणि उपलब्ध स्टॉक अधिकाधिक ग्राहकांना मिळावा, यासाठी काही ऑनलाइन विक्रेत्यांनी खरेदीचे प्रमाण मर्यादित केल्याचे मानले जात आहे. त्यामुळे साखरेच्या वाढत्या दरांदरम्यान ऑनलाइन खरेदी करणाऱ्या ग्राहकांना आता ऑर्डर देण्यापूर्वी संबंधित ॲपवरील खरेदीची मर्यादा तपासावी लागणार आहे.