‘शुद्धीकरणा’वरून राहुल गांधींचा भाजपवर हल्लाबोल

rahul gandhi लोकसभेतील विरोधी पक्षनेते राहुल गांधी यांनी दलितांवरील भेदभाव आणि उत्तराखंडमधील ‘शुद्धीकरण’ाच्या घटनेचा मुद्दा उपस्थित करत भाजप आणि आरएसएसवर जोरदार टीका केली. अशा प्रकारच्या घटनांमध्ये संबंधितांविरोधात अनुसूचित जाती-जमाती अत्याचार प्रतिबंधक कायद्यानुसार एफआयआर दाखल करण्यात यावा, अशी मागणी त्यांनी केली. समाजात दलितांना आजही विविध स्तरांवर भेदभावाचा सामना करावा लागत असल्याचा आरोप राहुल गांधी यांनी केला.

 

 

भारत हा विविध जाती, धर्म, भाषा आणि संस्कृती असलेला देश असल्याचे सांगत राहुल गांधी यांनी स्वातंत्र्याला ८० वर्षे उलटूनही दलितांवरील अत्याचार थांबले नसल्याचे म्हटले. एखादे भांडे हाताळणे, मिशा ठेवणे किंवा मंदिरात जाऊन मूर्तीला स्पर्श करणे यांसारख्या कारणांवरून दलितांवर हल्ले होत असल्याचा दावा त्यांनी केला. घोड्यांनी ओढलेल्या लग्नाच्या मिरवणुकांनाही काही ठिकाणी लक्ष्य केले जात असल्याचे ते म्हणाले.

 

उत्तराखंडमध्ये मल्लिकार्जुन खर्गे यांच्या सभेनंतर कार्यक्रमाच्या ठिकाणी करण्यात आलेल्या ‘शुद्धीकरणा’वरूनही राहुल गांधी यांनी प्रश्न उपस्थित केला. खर्गे हल्द्वानी येथे गेल्यानंतर सभेच्या जागेचे शुद्धीकरण करण्यात आल्याचा उल्लेख त्यांनी केला. खर्गे यांनी राज्यसभेत हा विषय मांडल्यानंतर जे. पी. नड्डा यांनी अशा प्रकारच्या घटना स्वीकारल्या जाणार नाहीत, चौकशी करून संबंधितांना शिक्षा केली जाईल, असे म्हटल्याचे राहुल गांधी यांनी सांगितले. मात्र, भाजपचे महेंद्र भट्ट यांनी या शुद्धीकरणाचे समर्थन केल्याचा आरोपही त्यांनी केला.

 

देशाच्या भवितव्याबाबत दोन वेगवेगळ्या विचारधारा असल्याचे राहुल गांधी म्हणाले. एका बाजूला डॉ. बाबासाहेब आंबेडकर यांची राज्यघटना आणि दुसऱ्या बाजूला आरएसएस व भाजपची विचारसरणी असल्याचा दावा त्यांनी केला. अशा घटनांमुळे देशाची एकता आणि सामाजिक सलोखा कसा टिकवला जाणार, असा सवाल उपस्थित करत या मुद्द्याकडे सर्वांनी गांभीर्याने पाहावे, असे आवाहन राहुल गांधी यांनी केले.