कमी पावसाचा संत्रा बागांना दुहेरी फटका
कीड वाढली, संत्र्याची फळगळ
Total Views |
तिवसा
scanty-rainfal तिवसा तालुक्यात यंदा पावसाचे प्रमाण अपेक्षेच्या तुलनेत कमी राहिल्याने त्याचा विपरित परिणाम संत्रा बागांवर होत असल्याचे चित्र दिसून येत आहे. कमी पावसामुळे संत्रा बागांमध्ये प्रतिकूल वातावरण निर्माण होऊन विविध किडींचा प्रादुर्भाव मोठ्या प्रमाणात वाढला आहे. परिणामी संत्र्याची फळगळ सुरू झाली असून, अनेक शेतकऱ्यांच्या बागांमधील तोंडाशी आलेला बहार गळून पडत असल्याने संत्रा उत्पादक शेतकरी आर्थिक संकटात सापडला आहे.
यंदा तालुक्यात पावसाचे प्रमाण कमी राहिल्याने संत्रा बागांना आवश्यक तेवढा ओलावा मिळाला नाही. कमी पावसामुळे बागांमध्ये विविध प्रकारच्या किडींचा प्रादुर्भाव वाढल्याचे शेतकऱ्यांकडून सांगण्यात येत आहे. किडींच्या वाढत्या प्रादुर्भावामुळे संत्र्याच्या फळांवर परिणाम होत असून, फळगळ मोठ्या प्रमाणात होत आहे.
शेतकऱ्यांनी महागडी औषधे, खते तसेच फवारण्यांवर खर्च करून बागा वाचविण्याचा प्रयत्न केला. मात्र, कमी पाऊस आणि वाढता किडीचा प्रादुर्भाव यामुळे शेतकऱ्यांच्या अडचणी कमी होण्याऐवजी वाढतच आहेत.
संत्रा बागेतील पीक तोंडाशी आले असताना मोठ्या प्रमाणात फळगळ होत असल्याने शेतकऱ्यांच्या वर्षभराच्या मेहनतीवर पाणी फेरले जाण्याची भीती निर्माण झाली आहे. उत्पादन चांगले मिळेल आणि केलेला खर्च भरून निघेल, अशी अपेक्षा असलेल्या शेतकऱ्यांना आता संभाव्य आर्थिक नुकसानीची चिंता सतावत आहे.
कमी पावसामुळे आधीच बागांच्या व्यवस्थापनाचा खर्च वाढला आहे. त्यात किडीचा वाढता प्रादुर्भाव आणि फळगळ यामुळे संत्रा उत्पादक शेतकरी दुहेरी संकटात सापडला आहे. काही शेतकऱ्यांच्या बागांमध्ये मोठ्या प्रमाणात संत्री गळून पडल्याने नुकसानीचे प्रमाण गंभीर असल्याचे शेतकऱ्यांचे म्हणणे आहे.
भांबोरा आणि अहमदाबाद परिसरातील संत्रा बागांची कृषी व महसूल विभागाने तातडीने पाहणी करावी. कमी पावसामुळे झालेली प्रतिकूल परिस्थिती, किडीचा प्रादुर्भाव आणि मोठ्या प्रमाणात झालेली फळगळ यांचे वस्तुनिष्ठ सर्वेक्षण करून नुकसानीचे पंचनामे करावेत, अशी मागणी शेतकऱ्यांकडून होत आहे.
कमी पावसामुळे संत्रा बागेत किडीचा प्रादुर्भाव मोठ्या प्रमाणात वाढला आहे. महागडी औषध फवारणी करूनही संत्र्याची गळती थांबत नसल्याने मोठे नुकसान होत आहे. तोंडाशी आलेला बहार डोळ्यांसमोर गळून पडत असल्याने वर्षभराची मेहनत वाया जाण्याची भीती आहे. शासनाने तातडीने संत्रा बागांची पाहणी करून पंचनामे करावेत आणि नुकसानग्रस्त शेतकऱ्यांना आर्थिक मदत द्यावी, अशी मागणी भांबोराचे पोलिस पाटील भालचंद्र पोल्हाड यांनी केली आहे.