व्हॅली ऑफ फ्लॉवर्सचा मनमोहक बहर!

valley of flowers निसर्गाच्या सान्निध्यात रंगीबेरंगी फुलांचा मनमोहक नजारा अनुभवायचा असेल, तर उत्तराखंडमधील व्हॅली ऑफ फ्लॉवर्स हे पर्यटकांसाठी खास आकर्षण ठरते. चमोली जिल्ह्यात पर्वतरांगांच्या कुशीत वसलेले व्हॅली ऑफ फ्लॉवर्स राष्ट्रीय उद्यान हे युनेस्कोचे जागतिक वारसा स्थळ आहे. समुद्रसपाटीपासून सुमारे ३,६०० मीटर उंचीवर असलेल्या या दरीत ५०० हून अधिक प्रकारची अल्पाइन फुले आढळतात. विशिष्ट हंगामात संपूर्ण परिसर विविध रंगांच्या फुलांनी सजून जातो.

 

 

या निसर्गरम्य ठिकाणी जाण्यासाठी जून, जुलै आणि ऑगस्ट हा कालावधी सर्वाधिक योग्य मानला जातो. मान्सूनच्या आगमनानंतर परिसरात हिरवळ वाढते आणि विविध फुलांना बहर येण्यास सुरुवात होते. त्यामुळे या काळात दरीचे रूप अधिकच आकर्षक दिसते. मात्र जूनच्या सुरुवातीला फुलांचा बहर तुलनेने कमी असतो. व्हॅली ऑफ फ्लॉवर्स साधारणपणे १ जूनला पर्यटकांसाठी खुली केली जाते. यावेळी बर्फ वितळण्याची प्रक्रिया सुरू असते, परिसर हिरवागार होतो आणि फुलांच्या कळ्या उमलू लागतात.

 

जुलैमध्ये दरीचे सौंदर्य आणखी खुलते. विशेषतः जुलैच्या मध्यापासून विविध फुले उमलण्यास सुरुवात झाल्याने संपूर्ण परिसर हिरव्या आणि रंगीबेरंगी छटांनी नटतो. ऑगस्टच्या पहिल्या दोन ते तीन आठवड्यांत फुलांचा मुख्य बहर पाहायला मिळतो. या काळात छातीच्या उंचीपर्यंत वाढलेली फुले मोठ्या प्रमाणावर दिसतात आणि संपूर्ण दरीवर फुलांचा गालिचा पसरल्यासारखे दृश्य निर्माण होते.

 

मात्र या भागाला भेट देताना हवामानाची परिस्थिती लक्षात घेणे आवश्यक आहे. पावसाळ्यात मुसळधार पावसामुळे पायवाटांवर भूस्खलनाचा धोका निर्माण होऊ शकतो. त्यामुळे प्रवासाचे नियोजन करताना काळजी घेणे गरजेचे आहे. लहान मुलांना सोबत घेऊन या ठिकाणी जाणे टाळण्याचा सल्ला दिला जातो. व्हॅली ऑफ फ्लॉवर्स राष्ट्रीय उद्यान साधारणपणे १ जून ते ३१ ऑक्टोबर या कालावधीत पर्यटकांसाठी खुले असते.