इंजेक्शन दिलं अन् काही मिनिटांतच...

eta news उत्तर प्रदेशातील एटा जिल्ह्यात तापावर उपचार घेत असलेल्या ३२ वर्षीय तरुणाचा संशयास्पद परिस्थितीत मृत्यू झाल्याची घटना समोर आली आहे. कुटुंबीयांनी दिलेल्या माहितीनुसार, नागला हिम्मत येथील एका स्थानिक व्यक्तीने तरुणाला उपचारादरम्यान इंजेक्शन दिले. त्यानंतर अवघ्या पाच मिनिटांत त्याची प्रकृती गंभीर झाली आणि त्याचा मृत्यू झाला.

 

 

मृत तरुणाचे नाव रत्नेश असल्याचे सांगण्यात आले आहे. त्याला काही काळापासून ताप होता. त्यामुळे कुटुंबीयांनी उपचारासाठी अशा एका स्थानिक व्यक्तीला घरी बोलावले होते, जो मेडिकल स्टोअर चालवण्यासोबतच घरी जाऊन रुग्णांवर उपचार करत असल्याचे कुटुंबीयांचे म्हणणे आहे. त्याने रत्नेशला तापासाठी इंजेक्शन दिल्यानंतर अचानक त्याची प्रकृती बिघडली. कुटुंबीयांनी रत्नेशला तातडीने अलिगंज येथील सामुदायिक आरोग्य केंद्रात नेले. मात्र, तेथील डॉक्टरांनी तपासणीनंतर त्याला मृत घोषित केले. या घटनेनंतर उपचार करणारी व्यक्ती घटनास्थळावरून पसार झाल्याचे सांगण्यात येत आहे.

 

ही घटना जसवंतपूर पोलीस ठाण्याच्या हद्दीत घडली. माहिती मिळताच पोलिसांनी घटनास्थळी पोहोचून मृतदेह ताब्यात घेतला आणि शवविच्छेदनासाठी जिल्हा मुख्यालयात पाठवला. जसवंतपूर पोलीस ठाण्याचे अधिकारी सुबोध कुमार उपाध्याय यांनी सांगितले की, सध्या पोलिसांकडून शवविच्छेदन अहवालाची प्रतीक्षा केली जात आहे. अहवालातून मृत्यूचे नेमके कारण स्पष्ट झाल्यानंतर पुढील कायदेशीर कारवाई केली जाईल. इंजेक्शन आणि तरुणाच्या मृत्यूचा नेमका संबंध आहे का, हेही तपासानंतर स्पष्ट होणार आहे. दरम्यान, उत्तर प्रदेशातील हापूर जिल्ह्यातील सिंभोली पोलीस ठाण्याच्या हद्दीतील माधापूर गावातही गंभीर घटना घडल्याचे वृत्त आहे. रात्री उशिरा एका तरुणाने घरात झोपलेल्या दोन बहिणींवर ॲसिडने हल्ला केला. या अचानक झालेल्या हल्ल्यात दोन्ही बहिणी गंभीररित्या भाजल्या.