चार तरुणांचा जागीच मृत्यू, १७ वर्षीय विष्णू बचावला

horrific thar accident उत्तर प्रदेशातील हापूड जिल्ह्यात गंगा एक्स्प्रेसवेवर मध्यरात्रीच्या सुमारास झालेल्या भीषण रस्ते अपघातात चार तरुणांचा मृत्यू झाला, तर एका १७ वर्षीय तरुणाला किरकोळ दुखापत झाली. बदायूंहून दिल्लीच्या दिशेने जाणारी भरधाव थार कार चालकाच्या नियंत्रणाबाहेर जाऊन एक्स्प्रेसवेवर अनेकदा पलटी झाली. त्यानंतर कार रस्त्याच्या कडेला जाऊन आदळली. या दुर्घटनेनंतर एक्स्प्रेसवेवर किंकाळ्या आणि आरडाओरड सुरू झाली असून काही काळ गोंधळाचे वातावरण निर्माण झाले होते.

 

 

ही घटना हापूडमधील सिंभावली पोलीस ठाण्याच्या हद्दीत असलेल्या गंगा एक्स्प्रेसवेवर रात्री सुमारे १२ वाजण्याच्या सुमारास घडली. बदायूंहून दिल्लीकडे निघालेली DL 8C BL 9822 क्रमांकाची थार कार अतिवेगामुळे चालकाच्या नियंत्रणाबाहेर गेली. नियंत्रण सुटताच कार एक्स्प्रेसवेवर अनेकदा उलटली आणि रस्त्याच्या कडेला जाऊन पडली. अपघाताची तीव्रता इतकी होती की कारचा अक्षरशः चक्काचूर झाला आणि त्यामध्ये प्रवास करणारे पाचही जण वाहनात अडकून पडले.

अपघाताची माहिती मिळताच आपत्कालीन सेवा ११२ तसेच सिंभावली पोलीस तातडीने घटनास्थळी दाखल झाले. पोलिसांनी स्थानिक नागरिकांच्या मदतीने मोठ्या प्रयत्नांनंतर कारमध्ये अडकलेल्या पाचही जणांना बाहेर काढले. त्यानंतर सर्वांना उपचारासाठी जवळच्या सीएचसी सिखेडा येथे दाखल करण्यात आले. मात्र, रुग्णालयात पोहोचल्यानंतर डॉक्टरांनी प्राथमिक तपासणीनंतर चार तरुणांना मृत घोषित केले. या दुर्घटनेत १७ वर्षीय विष्णू याचे नशीब बलवत्तर ठरले. त्याला केवळ किरकोळ दुखापत झाली असून त्याची प्रकृती धोक्याबाहेर असल्याचे सांगण्यात आले.

या अपघातात मृत्यू झालेल्यांची ओळख  horrific thar accident  पटली असून जोगिंदर (वय २६), सुखबीर (वय २५), जसवंत (वय २०) आणि रवि (वय २०) अशी मृतांची नावे आहेत. हे चौघेही बदायूं जिल्ह्यातील वेगवेगळ्या गावांतील रहिवासी होते. अपघातातील जखमी विष्णू (वय १७) हादेखील बदायूं जिल्ह्यातील पालपूर गावचा रहिवासी आहे.अपघातानंतर पोलिसांनी चारही मृतदेह ताब्यात घेऊन शवविच्छेदनासाठी रुग्णालयात पाठवले. दरम्यान, एक्स्प्रेसवेवर उभी असलेली दुर्घटनाग्रस्त थार क्रेनच्या सहाय्याने हटवण्यात आली आणि वाहतुकीचा मार्ग मोकळा करण्यात आला. या प्रकरणी पोलिसांकडून पुढील कायदेशीर तपास सुरू आहे.