अतिवृष्टीची शक्यता देशातील १८ राज्यांना पावसाचा इशारा

imd rain alert उत्तर प्रदेश, बिहार, उत्तराखंड, झारखंड आणि ओडिशासह देशातील अनेक राज्यांमध्ये पावसाचा जोर कायम आहे. या पार्श्वभूमीवर भारतीय हवामान विभागाने (IMD) १८ राज्यांसाठी हलक्या ते मुसळधार पावसाचा इशारा जारी केला आहे. उत्तर-पश्चिम बंगालच्या उपसागरात तसेच पश्चिम बंगाल-उत्तर ओडिशा किनारपट्टीजवळ निर्माण झालेले कमी दाबाचे क्षेत्र अद्याप सक्रिय असून, त्याच्या प्रभावामुळे पूर्व आणि मध्य भारतातील पावसाच्या हालचाली वाढण्याची शक्यता आहे. मुसळधार पावसामुळे सखल भागांमध्ये पाणी साचून पूरस्थिती निर्माण होऊ शकते, तर डोंगराळ भागांत भूस्खलन आणि दरडी कोसळण्याचा धोका वाढला आहे.

 

 

IMDने उत्तर प्रदेश, उत्तराखंड, हिमाचल प्रदेश, जम्मू-काश्मीर, बिहार, झारखंड, पश्चिम बंगाल, ओडिशा, छत्तीसगड, मध्य प्रदेश, अरुणाचल प्रदेश, आसाम, मेघालय, नागालँड, महाराष्ट्र, कर्नाटक आणि केरळमध्ये पावसाचा इशारा दिला आहे.

उत्तर प्रदेशातील अनेक जिल्ह्यांमध्ये सोमवारी मुसळधार पावसाची शक्यता आहे. वाराणसी, गोरखपूर, आझमगड, बलिया, गाझीपूर, मऊ, जौनपूर, देवरिया, कुशीनगर, महाराजगंज, संत कबीर नगर, बस्ती, सिद्धार्थनगर, भदोही, चंदौली, मिर्झापूर, मेरठ, शामली, गाझियाबाद, बुलंदशहर, मुरादाबाद, बिजनौर, रामपूर, अमरोहा आणि संभल या जिल्ह्यांमध्ये पाऊस होऊ शकतो. काही ठिकाणी वादळी वाऱ्यांसह विजांचा कडकडाट आणि वीज कोसळण्याचीही शक्यता वर्तवण्यात आली आहे.

बिहारमध्ये ३१ ऑगस्ट रोजी अनेक भागांत पाऊस पडण्याची शक्यता असून, काही ठिकाणी मुसळधार पावसासह मेघगर्जना आणि वेगवान वारे वाहू शकतात. १ आणि २ सप्टेंबरलाही पावसाचा जोर कायम राहण्याची शक्यता आहे. त्यानंतर ३ ते ५ सप्टेंबरदरम्यान काही भागांत पाऊस होण्याचा अंदाज आहे. मागील २४ तासांत औरंगाबादमध्ये सुमारे ८ सेंटीमीटर पावसाची नोंद झाली आहे.

उत्तराखंडमध्ये ३१ ऑगस्ट रोजी हवामान सर्वाधिक खराब राहण्याची शक्यता आहे. ३१ ऑगस्ट आणि १ सप्टेंबर रोजी राज्यातील काही भागांत अतिमुसळधार पावसाचा अंदाज आहे. पुढील २४ तासांसाठी अल्मोडा, बागेश्वर, चमोली, चंपावत, डेहराडून, नैनीताल, रुद्रप्रयाग, टिहरी गढवाल, पौडी गढवाल आणि उत्तरकाशी या जिल्ह्यांमध्ये कमी ते मध्यम स्वरूपाच्या फ्लॅश फ्लडचा धोका असल्याचे IMDने म्हटले आहे.

हिमाचल प्रदेशातही ३१ ऑगस्टपासून पावसाचा जोर वाढण्याची शक्यता आहे. शिमला, सिरमौर, चंबा, हमीरपूर, कांगडा, किन्नौर, कुल्लू आणि लाहौल-स्पीतीसह अनेक जिल्ह्यांत ३१ ऑगस्ट ते ५ सप्टेंबरदरम्यान मुसळधार पाऊस होऊ शकतो.

झारखंडमध्ये ३१ ऑगस्ट रोजी मुसळधार ते अतिमुसळधार पावसाची शक्यता असून, ३१ ऑगस्ट ते २ सप्टेंबरदरम्यान राज्यातील अनेक भागांत पावसाचा जोर कायम राहू शकतो. पूर्व सिंहभूम, पश्चिम सिंहभूम, खूंटी, सिमडेगा, गुमला, लोहरदगा, लातेहार, पलामू, हजारीबाग, गढवा आणि चतरा या जिल्ह्यांमध्ये पुढील २४ तासांत कमी ते मध्यम स्वरूपाच्या फ्लॅश फ्लडचा धोका असल्याचे हवामान विभागाने म्हटले आहे. सातत्याने होणाऱ्या पावसामुळे सखल भागांत पाणी साचण्याबरोबरच पाण्याचा वेगवान प्रवाह निर्माण होण्याची शक्यता आहे.

ओडिशामध्ये ३१ ऑगस्ट रोजी अत्यंत मुसळधार पावसाची शक्यता असून, १ सप्टेंबरलाही काही भागांत अतिमुसळधार पाऊस होऊ शकतो. छत्तीसगडमध्येही ३१ ऑगस्ट रोजी अत्यंत मुसळधार पावसाचा इशारा देण्यात आला आहे.

दरम्यान, राजधानी दिल्लीत ३१ ऑगस्ट रोजी आकाश अंशतः ढगाळ राहण्याची शक्यता आहे. कमाल तापमान ३५ ते ३७ अंश सेल्सिअसच्या दरम्यान राहण्याचा अंदाज आहे. १ सप्टेंबर रोजी दुपारपासून संध्याकाळपर्यंत काही भागांत हलक्या पावसासह वादळी वारे आणि विजांचा कडकडाट होण्याची शक्यता हवामान विभागाने व्यक्त केली आहे.