ते चांगले आहेत, पण...

wangchuks major statement २६ दिवसांच्या उपोषणातून कॉकरोच जनता पार्टी (सीजेपी)च्या आंदोलनाला पाठिंबा देणारे सामाजिक आणि पर्यावरण कार्यकर्ते सोनम वांगचुक यांनी सीजेपीच्या नेत्यांबाबत सावध भूमिका मांडली आहे. अभिजीत दीपके यांच्यासह अन्य नेते सध्या चांगले तरुण असल्याचे आपले मत असल्याचे त्यांनी सांगितले. मात्र, भविष्यात हे नेते भ्रष्टाचारापासून दूर राहतील किंवा राजकीय फायद्यासाठी काम करणार नाहीत, याची आपण कोणतीही हमी देऊ शकत नसल्याचे वांगचुक यांनी स्पष्ट केले.

 

 

प्रखर गुप्ता यांच्या पॉडकास्टमध्ये बोलताना वांगचुक यांना सीजेपीच्या नेतृत्वाबाबत त्यांच्या मूल्यांकनाविषयी विचारण्यात आले. त्यावर त्यांनी सांगितले की, आतापर्यंतच्या निरीक्षणात या नेत्यांमध्ये भ्रष्टाचाराची कोणतीही चिन्हे दिसलेली नाहीत. मात्र, माणसांमध्ये काळानुसार बदल होऊ शकतो, त्यामुळे भविष्यातही ते तसेच राहतील असे निश्चितपणे सांगता येणार नाही. आजच्या परिस्थितीत सामान्य लोकांच्या तुलनेत हे नेते चांगले वाटतात, असेही त्यांनी नमूद केले.

 

वांगचुक यांनी सीजेपीच्या नेत्यांना संत मानण्यास नकार दिला. मात्र, आजच्या भारतात अपेक्षित असलेल्या नेतृत्वाच्या निकषांवर ते चांगले, किंबहुना खूप चांगले असल्याचे त्यांनी म्हटले. विधानसभा आणि संसदेत निम्मे सदस्य गुन्हेगारी पार्श्वभूमीचे असल्याचा संदर्भ देत त्यांनी चांगल्या नेतृत्वाची गरज अधोरेखित केली. त्यामुळे अशा नेत्यांकडे पाहताना भविष्यातही सावध राहणे आवश्यक असल्याचे वांगचुक यांनी सांगितले.

 

सीजेपीच्या नेत्यांच्या राजकीय महत्त्वाकांक्षेबाबतही वांगचुक यांनी आपले मत स्पष्ट केले. त्यांच्या निरीक्षणानुसार या नेत्यांना राजकारणात येण्याची इच्छा आहे आणि त्यात काहीही चुकीचे नाही. एखाद्या राजकीय पक्षात सहभागी होणे, भविष्यात स्वतःचा पक्ष स्थापन करणे किंवा राजकीय भूमिका घेणे हा त्यांचा अधिकार असल्याचे त्यांनी म्हटले. मात्र, सीजेपीचे व्यासपीठ सुरुवातीपासून राजकीय पक्ष म्हणून उभे राहिलेले नसल्याने त्याची वेगळी ओळख आणि पवित्रता कायम ठेवली पाहिजे, असा सल्ला त्यांनी दिला.

 

वांगचुक यांच्या मते, लोकांनी या उपक्रमाकडे विद्यार्थी चळवळ म्हणून पाहिले आहे. त्यामुळे त्याला कोणताही राजकीय रंग देणे योग्य ठरणार नाही. सीजेपीच्या नेत्यांनी आतापर्यंत ही भूमिका कायम ठेवली असून, त्याबद्दल आपल्याला आनंद असल्याचेही त्यांनी स्पष्ट केले.