अमृता खानविलकर घटस्फोटाच्या उंबरठ्यावर?

Amruta Khanvilkar Divorce मराठी अभिनेत्री अमृता खानविलकर आणि तिचे पती अभिनेता हिमांशू मल्होत्रा यांच्या वैवाहिक आयुष्याबाबत सध्या विविध चर्चा सुरू आहेत. दोघेही गेल्या सुमारे १८ महिन्यांपासून स्वतंत्रपणे राहत असल्याचे वृत्त समोर आले असून, त्यामुळे त्यांच्या नात्यात दुरावा आल्याच्या आणि घटस्फोटाच्या शक्यतेच्या चर्चांना उधाण आले आहे. मात्र, या वृत्तांना अद्याप अमृता किंवा हिमांशू यांनी अधिकृत दुजोरा दिलेला नाही.गेल्या काही महिन्यांपासून दोघे एकत्र दिसत नसल्याने आणि अमृताच्या व्लॉगमध्येही हिमांशू दिसत नसल्याने चाहत्यांमध्ये विविध तर्कवितर्क सुरू झाले आहेत. सोशल मीडियावरही या चर्चांना मोठ्या प्रमाणात उधाण आले आहे. मात्र, या सर्व चर्चांवर दोघांनीही सार्वजनिक भूमिका मांडलेली नाही.

 

 

 

 

सूत्रांच्या हवाल्याने दिलेल्या वृत्तानुसार, अमृता खानविलकर आणि हिमांशू मल्होत्रा यांनी परस्पर संमतीने काही काळ स्वतंत्र राहण्याचा निर्णय घेतला आहे. दोघांचे कामाचे स्वरूप, व्यस्त वेळापत्रक आणि वेगवेगळ्या ठिकाणी सुरू असलेल्या व्यावसायिक जबाबदाऱ्यांमुळे हा निर्णय घेण्यात आल्याचे सांगितले जात आहे, सूत्रांच्या माहितीनुसार, वेगळे राहत असले तरी दोघांमधील संवाद कायम आहे. वैयक्तिक आणि व्यावसायिक विषयांवर ते नियमित चर्चा करतात आणि त्यांच्यात मैत्रीपूर्ण संबंध असल्याचेही सांगितले जात आहे. भविष्यात पुन्हा एकत्र राहायचे की अधिकृतपणे वेगळे व्हायचे, याबाबत योग्य वेळी निर्णय घेतला जाईल, असेही या वृत्तात नमूद करण्यात आले आहे.

 

 

दरम्यान, मनोरंजन विश्वात अलीकडच्या काळात अनेक सेलिब्रिटी जोडप्यांनी विभक्त होण्याचा निर्णय घेतल्याने अशा चर्चांना अधिक महत्त्व प्राप्त होत आहे. काही दिवसांपूर्वी अभिनेता आदिनाथ कोठारे आणि अभिनेत्री ऊर्मिला कानेटकर यांनीही अधिकृतपणे घटस्फोट घेतला होता. त्यामुळे अमृता खानविलकर आणि हिमांशू मल्होत्रा यांच्या नात्याबाबत सुरू असलेल्या चर्चांकडेही चाहत्यांचे लक्ष लागले आहे. मात्र, अधिकृत भूमिका समोर येईपर्यंत या सर्व चर्चा केवळ वृत्ते आणि सूत्रांच्या माहितीनुसार असल्याचे लक्षात घेणे महत्त्वाचे आहे.