३०० कोटींच्या क्लबमध्ये 'स्पायडर-मॅन'ची एंट्री

spider man 'स्पायडर-मॅन: ब्रँड न्यू डे' हा चित्रपट भारतीय बॉक्स ऑफिसवर दमदार कामगिरी करत असून प्रदर्शनाच्या अवघ्या सहाव्या दिवशीच त्याने ३०० कोटी रुपयांचा टप्पा पार केला आहे. टॉम हॉलंड, झेंडाया, सॅडी सिंक आणि जेकब बॅटलन यांच्या प्रमुख भूमिका असलेल्या या चित्रपटाला भारतीय प्रेक्षकांकडून मोठा प्रतिसाद मिळत असून आठवड्याच्या सुरुवातीच्या दिवसांतही त्याची कमाई वेगाने वाढत आहे.

 

 

चित्रपटाने पहिल्या दिवशी ६०.६० कोटी रुपयांची कमाई केली. दुसऱ्या दिवशी ४९.३५ कोटी, तिसऱ्या दिवशी ७०.२५ कोटी आणि चौथ्या दिवशी ७७.७५ कोटी रुपयांची कमाई झाली. पाचव्या दिवशी चित्रपटाने २३.८० कोटी रुपये मिळवले. सॅकनिल्कच्या प्राथमिक आकडेवारीनुसार, प्रदर्शनाच्या सहाव्या दिवशी म्हणजेच पहिल्या मंगळवारी चित्रपटाने आणखी २१.५० कोटी रुपयांची कमाई केली. त्यामुळे भारतातील या चित्रपटाची एकूण कमाई ३०३.२५ कोटी रुपयांवर पोहोचली आहे.

 

या विक्रमी कामगिरीसह 'स्पायडर-मॅन: ब्रँड न्यू डे'ने अनेक बॉलिवूड चित्रपटांच्या लाइफटाईम कलेक्शनलाही मागे टाकले आहे. अक्षय कुमारच्या 'भूत बंगला'ने १९९ कोटी रुपये, तर अजय देवगणच्या 'धमाल ४'ने १७१ कोटी रुपयांची कमाई केली होती. या दोन्हींसह एकूण सात हिंदी चित्रपटांना 'स्पायडर-मॅन: ब्रँड न्यू डे'ने मागे सोडले आहे. सध्या हा चित्रपट केवळ 'बॉर्डर २'च्या ३६७ कोटी आणि 'धुरंदर २'च्या ११८६.३२ कोटी रुपयांच्या कमाईच्या मागे आहे.

 

या चित्रपटाची कथा 'स्पायडर-मॅन: नो वे होम'मधील घटनांनंतर चार वर्षांनी सुरू होते. पीटर पार्कर आपल्या आयुष्यात पूर्णपणे एकटा राहण्याचा निर्णय घेतो आणि एमजे तसेच नेड यांच्या आठवणींमधून स्वतःला दूर करतो. न्यूयॉर्कचे संरक्षण करण्यासाठी स्पायडर-मॅन म्हणून तो झटत असताना त्याला एकटेपणा, स्वतःच्या ओळखीबाबतचे प्रश्न आणि नव्या शत्रूंचा सामना करावा लागतो. भावनिक संघर्ष, थरार आणि नव्या धोक्यांनी भरलेला हा चित्रपट प्रेक्षकांना खिळवून ठेवत आहे. डेस्टिन डॅनियल क्रेटन यांनी या चित्रपटाचे दिग्दर्शन केले असून ख्रिस मॅकेना आणि एरिक सॉमर्स यांनी पटकथा लिहिली आहे. कोलंबिया पिक्चर्स, मार्व्हल स्टुडिओज आणि पास्कल पिक्चर्स यांनी चित्रपटाची निर्मिती केली आहे. टॉम हॉलंड, झेंडाया, सॅडी सिंक, जेकब बॅटलन, जॉन बर्न्थॉल, मार्क रफालो आणि फ्लॉरेन्स प्यू यांनी चित्रपटात प्रमुख भूमिका साकारल्या आहेत.