श्रीलंकेविरुद्ध गिलच्या निशाण्यावर दोन मोठे विक्रम!

gills sights against sri lanka भारत आणि श्रीलंका यांच्यातील दोन सामन्यांच्या कसोटी मालिकेला १५ ऑगस्टपासून सुरुवात होत असून, भारतीय संघाचा कर्णधार शुभमन गिल याच्यासमोर या मालिकेत दोन महत्त्वाचे विक्रम नोंदवण्याची संधी आहे. पहिल्याच कसोटीत मोठी खेळी केल्यास तो वर्ल्ड टेस्ट चॅम्पियनशिप (डब्ल्यूटीसी) २०२५-२७ मध्ये सर्वाधिक धावा करणारा फलंदाज बनू शकतो.

 

 

सध्या डब्ल्यूटीसी २०२५-२७ मध्ये इंग्लंडचा जो रूट १३ सामन्यांतील २५ डावांत ४८.१७ च्या सरासरीने ११०८ धावांसह अव्वल स्थानावर आहे. शुभमन गिलने आतापर्यंत ८ सामन्यांत ९५० धावा केल्या आहेत. त्यामुळे श्रीलंकेविरुद्धच्या पहिल्या कसोटीत गिलने १५९ धावांची खेळी केली, तर तो जो रूटला मागे टाकत या यादीत पहिल्या क्रमांकावर पोहोचेल. दरम्यान, १८ ऑगस्टपासून इंग्लंड आणि पाकिस्तान यांच्यातील कसोटी सामन्यालाही सुरुवात होणार असल्याने गिलकडे पहिल्याच डावात मोठी खेळी करण्याची सुवर्णसंधी आहे.

 

डब्ल्यूटीसी २०२५-२७ मधील सर्वाधिक धावा करणाऱ्या फलंदाजांच्या यादीत जो रूटनंतर इंग्लंडचाच हॅरी ब्रूक दुसऱ्या स्थानावर असून त्याने १३ सामन्यांत १०५६ धावा केल्या आहेत. त्यानंतर शुभमन गिलचा क्रमांक लागतो. इंग्लंडचा बेन डकेट १३ सामन्यांत ९१० धावांसह चौथ्या स्थानावर, तर ऑस्ट्रेलियाचा ट्रॅव्हिस हेड ८ सामन्यांत ८५३ धावांसह पाचव्या स्थानावर आहे.

 

याशिवाय, गिलसमोर डब्ल्यूटीसीच्या इतिहासात आणखी एक मोठा टप्पा गाठण्याची संधी आहे. त्याला ३००० धावांचा टप्पा पूर्ण करण्यासाठी केवळ १५७ धावांची आवश्यकता आहे. दोन सामन्यांच्या या मालिकेत तो हा विक्रमही आपल्या नावावर करू शकतो. दरम्यान, भारतीय संघ श्रीलंकेत दाखल झाला असून, कसोटी मालिकेपूर्वी ७ ऑगस्टपासून श्रीलंका इलेव्हनविरुद्ध सराव सामना खेळणार आहे.