डॉ. नीलम गोऱ्हे यांनी रविवारी हुडकेश्वर पोलिस ठाण्याला भेट देऊन या लैंगिक अत्याचार प्रकरणाच्या तपासाचा आढावा घेतला. यावेळी शहराचे सह पोलिस आयुक्त नवीनचंद्र रेड्डी यांच्यासह संबंधित अधिकारी उपस्थित होते. गुन्ह्याचा तपास, आरोपीची पृष्ठभूमी, मोबाईल व अन्य डिजिटल पुरावे, सायबर तपास आणि संभाव्य लागेबांधे याबाबत अधिकाऱ्यांकडून माहिती घेतली. आरोपीने यापूर्वी नागपूरबाहेर अन्य जिल्ह्यांत किंवा राज्यांत अशाच प्रकारचे गुन्हे केले आहेत का? त्याला आणखी कोणाची मदत मिळाली आहे का? याचीही चौकशी करण्याची आवश्यकता डॉ. गोऱ्हे यांनी व्यक्त केली. आरोपीचा मोबाईल, कॉल रेकॉर्ड, सोशल मीडिया व अन्य डिजिटल पुराव्यांचे तांत्रिक विश्लेषण करावे. त्याच्या संपर्कातील संशयित व्यक्तींची सायबर तपासाच्या माध्यमातून पडताळणी करावी तसेच परिसरातील नागरिकांकडूनही आवश्यक माहिती घेऊन तपासाची व्याप्ती वाढवावी, अशी सूचना त्यांनी केली.

प्रकरणाची व्याप्ती, आरोपीची पृष्ठभूमी, त्याचे अन्य जिल्हे किंवा राज्यांतील संभाव्य संबंध, मोबाईल व डिजिटल पुरावे, सायबर तपास तसेच त्याला मदत करणाऱ्या अन्य व्यक्तींचा शोध या सर्व बाबी लक्षात घेतल्या तर तपासासाठी केवळ दोन दिवसांचा कालावधी अपुरा वाटतो, त्यामुळे जनभावनांचा आदर व्हायला हवा. आवश्यकता भासल्यास सायबर गुन्हे शाखेच्या माध्यमातून मोबाईल व अन्य डिजिटल पुराव्यांचे सखोल तांत्रिक विश्लेषण करून त्यातून समोर येणाऱ्या प्रत्येक व्यक्तीच्या भूमिकेची चौकशी करण्यात यावी, अशी सूचना डॉ. गोऱ्हे यांनी केली.

पोलिस खात्याचे टोचले कान