पहिला गेम गेला, पण सामना नाही! अश्मिताने कोरियात रचला इतिहास

ashmita scripts history in korea भारतीय बॅडमिंटनमध्ये २०२६ हे वर्ष दमदार ठरत असतानाच अश्मिता चालिहाने आपल्या कारकिर्दीतील मोठे यश नोंदवले आहे. २६ वर्षीय अश्मिताने कोरिया मास्टर्स सुपर ३०० स्पर्धेच्या महिला एकेरीचे विजेतेपद पटकावत पहिले BWF वर्ल्ड टूर विजेतेपद आपल्या नावावर केले. अंतिम सामन्यात तिने चीनच्या चौथ्या मानांकित हान कियान शिला पराभूत करत ही ऐतिहासिक कामगिरी केली. अंतिम लढतीत अश्मिताला सुरुवातीला अपेक्षित लय सापडली नाही. चांगली सुरुवात केल्यानंतर हान कियान शिने सामन्यात जोरदार पुनरागमन केले आणि पहिला गेम २१-१४ असा आपल्या नावावर केला. त्यामुळे अश्मितासमोर पुढील दोन्ही गेममध्ये दमदार पुनरागमन करण्याचे आव्हान होते.

 

 

दुसऱ्या गेममध्ये मात्र भारतीय खेळाडूने आक्रमक खेळाचा आधार घेत सामन्याचे चित्रच बदलून टाकले. अश्मिताने आपल्या स्मॅशचा प्रभावी वापर करत हानवर दबाव निर्माण केला. सुरुवातीला दोघींची ६-६ अशी बरोबरी होती. त्यानंतर अश्मिताने गुणांची आघाडी वाढवत दुसरा गेम २१-१४ असा जिंकला आणि सामना १-१ असा बरोबरीत आणला. निर्णायक तिसऱ्या गेममध्येही अश्मिताने आक्रमकता कायम ठेवली. तिने हान कियान शिला सामन्यात पुनरागमनाची संधीच दिली नाही. अखेर तिने तिसरा गेमही २१-१४ असा जिंकत ५३ मिनिटांत अंतिम सामना आपल्या बाजूने संपवला आणि कोरिया मास्टर्सचे विजेतेपद पटकावले.

 

विजयानंतर अश्मिताने आपल्या भावना व्यक्त करताना हा क्षण अविश्वसनीय असल्याचे सांगितले. पहिल्या गेममध्ये ड्रिफ्टमुळे खेळणे आव्हानात्मक ठरले आणि त्यावर नियंत्रण ठेवता आले नाही, असे तिने नमूद केले. दुसऱ्या गेममध्ये परिस्थिती सुधारल्याने पुनरागमन करणे शक्य झाले. तिसऱ्या गेममध्ये ११ गुणांनंतर रणनीतीत बदल केल्याचा फायदा झाला आणि त्यातून सामना जिंकता आला, असेही अश्मिताने सांगितले. या विजयामुळे भविष्यात आणखी स्पर्धा जिंकण्याची भूक वाढल्याचे तिने स्पष्ट केले.

 

भारतीय महिला बॅडमिंटनपटूंसाठीही हे वर्ष उल्लेखनीय ठरत आहे. अश्मिताच्या आधी तन्वी शर्माने तैपेई ओपनचे विजेतेपद पटकावले होते. त्याचप्रमाणे पीव्ही सिंधूने जपान ओपन, तर देविका सिहागने थायलंड मास्टर्समध्ये बाजी मारली आहे. त्यामुळे २०२६ मध्ये भारतीय महिला बॅडमिंटनपटूंच्या प्रभावी कामगिरीत अश्मिता चालिहाच्या कोरिया मास्टर्स विजेतेपदाची भर पडली आहे.