पुराचा कहर; सरकारकडून नागरिकांना मासे न खाण्याचा सल्ला

bihar flood alert बिहारमध्ये पूरस्थिती निर्माण झाल्याच्या पार्श्वभूमीवर राज्य सरकारने नागरिकांच्या आरोग्याच्या दृष्टीने महत्त्वाच्या मार्गदर्शक सूचना जारी केल्या आहेत. बिहार सरकारच्या डेअरी, मत्स्य आणि पशू संसाधन विभागाने राज्यातील जनतेला काही काळ मासे न खाण्याचे आवाहन केले आहे. नेपाळमध्ये आलेल्या जलप्रलयाचा बिहारमधील या परिस्थितीशी संबंध असल्याचे सांगितले जात असून, पुराच्या पाण्यासोबत काही अनोळखी आणि असामान्य प्रकारचे मासे बिहारच्या नद्यांमध्ये दाखल झाल्याचे विभागाने म्हटले आहे.

 

 

नेपाळमध्ये आलेल्या जलप्रलयानंतर पुराचे पाणी बिहारच्या विविध भागांत पोहोचले आहे. या पाण्यासोबत काही अपरिचित प्रकारचे मासे बिहारमधील नद्यांमध्ये आल्याचे समोर आले आहे. या प्रकारचे मासे खाल्ल्यानंतर काही नागरिक आजारी पडल्याच्या घटना समोर आल्याने मत्स्य विभागाने नागरिकांना खबरदारी घेण्याचे आवाहन केले आहे. त्यामुळे सध्याच्या परिस्थितीत अनोळखी मासे खाणे टाळावे, असे विभागाने स्पष्ट केले आहे.

पूरस्थिती निर्माण झाल्यानंतर तलाव, नद्या, सरोवरे आणि विविध जलाशयांमधील मासे बाहेर पडून मोठ्या अंतरापर्यंत वाहून जाण्याची शक्यता असते. या काळात हे मासे सांडपाण्याचे नाले, मृत जनावरे आणि अन्य दूषित पदार्थांच्या संपर्कात येतात. त्यामुळे त्यांच्यावर जीवाणू, विषाणू आणि इतर घातक घटकांचा परिणाम होण्याची शक्यता वाढते. अशा दूषित माशांचे सेवन केल्यास नागरिकांची प्रकृती बिघडण्याचा धोका अधिक असल्याचे मत्स्य विभागाने स्पष्ट केले आहे.

जोपर्यंत पूरस्थिती निवळत नाही, वातावरण स्थिर होत नाही आणि नैसर्गिकरित्या घाण तसेच आजार पसरवणारे घटक दूर होत नाहीत, तोपर्यंत पुराच्या पाण्यात पकडलेले मासे खाऊ नयेत, असे विभागाने म्हटले आहे. नागरिकांच्या आरोग्याच्या सुरक्षेच्या दृष्टीने या सूचना जारी करण्यात आल्या आहेत. यासोबतच पुराच्या पाण्यात पकडलेले मासे बाजारात विकण्यासही मनाई करण्यात आली आहे.

नागरिकांनी कोणत्याही प्रकारचे अनोळखी मासे खरेदी करू नयेत किंवा त्यांचे सेवन करू नये, असेही मत्स्य विभागाने स्पष्ट केले आहे. असे मासे स्वस्त दरात उपलब्ध होत असले तरी त्यांना भुलून खरेदी करू नये, असा इशाराही देण्यात आला आहे.

दरम्यान, चुकून अशा माशांचे सेवन झाले आणि त्यानंतर उलट्या, जुलाब, पोटदुखी, चक्कर येणे किंवा श्वास घेण्यास त्रास होणे यांसारखी लक्षणे जाणवली, तर नागरिकांनी विलंब न करता जवळच्या रुग्णालयाशी संपर्क साधावा, असे आवाहन विभागाने केले आहे.

याशिवाय, नागरिकांना अनोळखी किंवा असामान्य प्रकारचे मासे आढळल्यास त्याची माहिती जिल्हा मत्स्य अधिकाऱ्यांना तसेच स्थानिक प्रशासनाला देण्याचे निर्देश देण्यात आले आहेत. या परिस्थितीत नागरिकांनी कोणत्याही अफवांवर विश्वास ठेवू नये आणि प्रशासनाकडून जारी करण्यात येणाऱ्या अधिकृत सूचनांचे पालन करावे, असेही मत्स्य विभागाने स्पष्ट केले आहे.