अर्जेंटिनाच्या फुटबॉलचा ‘बादशाह’ निवृत्त!

Messi's international journey end फुटबॉलविश्वातील दिग्गज नाव लिओनेल मेस्सीने वयाच्या ३९व्या वर्षी आंतरराष्ट्रीय फुटबॉलमधून निवृत्ती जाहीर केली आहे. दोन दशकांहून अधिक काळ अर्जेंटिनाच्या राष्ट्रीय संघाची जर्सी परिधान करत मैदान गाजवणाऱ्या मेस्सीचा राष्ट्रीय संघातील प्रवास आता संपला आहे. त्याच्या नेतृत्वाखाली अर्जेंटिनाने २०२२ मध्ये फिफा विश्वचषक जिंकला होता. २०२६ मध्येही अर्जेंटिना अंतिम सामन्यापर्यंत पोहोचला, मात्र स्पेनकडून पराभव झाल्याने संघाला सलग दुसऱ्यांदा विश्वविजेतेपद मिळवता आले नाही. राष्ट्रीय संघाचा निरोप घेताना मेस्सीने सोशल मीडियावर भावनिक संदेश लिहिला. देशासाठी आपल्याकडून जे काही शक्य होते ते सर्व दिल्यानंतर आता थांबण्याची वेळ आली असल्याची भावना त्याने व्यक्त केली. हा निर्णय घेणे त्याच्यासाठी सोपे नव्हते, मात्र सध्याची वेळ योग्य असल्याचे त्याला जाणवले. अर्जेंटिनाच्या जर्सीसाठी त्याने केवळ विजेतेपदाच्या काळातच नव्हे, तर त्याआधीच्या संपूर्ण प्रवासातही पूर्ण क्षमतेने योगदान दिल्याचे त्याने आपल्या संदेशातून सांगितले.

 

 

मेस्सीच्या आंतरराष्ट्रीय कारकिर्दीला सर्वात मोठे यश २०२२ च्या कतार विश्वचषकात मिळाले. कर्णधार म्हणून त्याने अर्जेंटिनाला १९८६ नंतर प्रथमच विश्वचषक जिंकून दिला. या स्पर्धेत मेस्सीने ७ गोल करत संघाच्या विजेतेपदात निर्णायक भूमिका बजावली. त्याच्या नेतृत्वाखाली अर्जेंटिनाने २०२१ आणि २०२४ मध्ये सलग दोन कोपा अमेरिका विजेतेपदांवरही नाव कोरले. २०२६ च्या विश्वचषकात अर्जेंटिनाला अंतिम फेरीपर्यंत नेणारा मेस्सी हा पुरुष विश्वचषकाच्या इतिहासात सर्वाधिक वेळा या स्पर्धेत खेळलेल्या खेळाडूंपैकी एक ठरला. त्याने कारकिर्दीत तीन विश्वचषकांच्या अंतिम सामन्यांमध्ये सहभाग घेतला. २०१४ मध्ये अर्जेंटिनाला जर्मनीकडून पराभव स्वीकारावा लागला होता.

 

 

त्यानंतर २०२२ मध्ये संघाने विश्वचषक जिंकला, तर २०२६ मध्ये अर्जेंटिनाला उपविजेतेपदावर समाधान मानावे लागले. आपल्या अखेरच्या विश्वचषकात मेस्सीने ८ गोल आणि ४ असिस्ट नोंदवल्या. दरम्यान, या महिन्याच्या सुरुवातीला मेस्सीचे वडील जॉर्ज मेस्सी यांचे ८ ऑगस्ट रोजी वयाच्या ६८व्या वर्षी निधन झाले. त्यानंतर मेस्सीने पुढे किती काळ फुटबॉल खेळत राहायचे याबाबत काही शंका व्यक्त केल्या होत्या. मात्र आंतरराष्ट्रीय क्रिकेटमधून निवृत्ती घेतल्यानंतरही तो क्लब स्तरावरील फुटबॉल सुरू ठेवणार आहे. मेस्सी सध्या अमेरिकेतील मेजर लीग सॉकरमधील इंटर मियामीकडून खेळत असून, त्याचा सध्याचा करार २०२८ च्या एमएलएस हंगामापर्यंत आहे.