‘हनुमान अंश’मधून धीरेंद्र यांचा नवा प्रवास

Dhirendra’s new journey जवळपास दोन दशकांच्या संघर्षानंतर धीरेंद्र मुलकलवार यांना स्वतंत्र संगीतकार म्हणून मोठ्या पडद्यावर आपली कला सादर करण्याची संधी मिळाली आहे. ‘हनुमान अंश’ या चित्रपटातून त्यांचा स्वतंत्र संगीतकार म्हणून प्रवास सुरू झाला असून, विशाल चतुर्वेदी यांनी या चित्रपटाचे दिग्दर्शन केले आहे. नीम करोली बाबा यांच्या आध्यात्मिक प्रवासावर आधारित असलेल्या या चित्रपटासाठी धीरेंद्र यांनी ‘सियावर रामचंद्र की जय’ हे गाणे संगीतबद्ध केले आहे. त्यामुळे हा प्रकल्प त्यांच्यासाठी केवळ एक चित्रपट न राहता, २० वर्षांच्या मेहनतीनंतर मिळालेले महत्त्वाचे यश ठरले आहे.

 

 

 

 

धीरेंद्र मुलकलवार यांनी आपल्या कारकिर्दीतील जवळपास २० वर्षे प्रसिद्धीच्या झोतात न येता स्वतंत्र प्रकल्प, जिंगल्स आणि संगीत निर्मितीच्या माध्यमातून काम केले. ‘उरी: द सर्जिकल स्ट्राइक’, ‘टॉयलेट: एक प्रेम कथा’ आणि ‘आर्टिकल १५’ यांसारख्या चित्रपटांमध्ये त्यांनी संगीत निर्माते म्हणून जबाबदारी सांभाळली. मोठ्या निर्मिती संस्थांसोबत काम करताना त्यांनी अनुभव मिळवला आणि त्यानंतर एखाद्या चित्रपटासाठी स्वतंत्रपणे संपूर्ण संगीत तयार करण्याची संधी मिळण्याची ते वाट पाहत होते. अखेर ‘हनुमान अंश’च्या माध्यमातून त्यांची ही प्रतीक्षा संपली.