रूम नंबर १०१ आणि मेलेली ब्युटिशियन!

Young woman dies in Indore hotel शहरातील एलएक्स हॉटेलच्या रूम नंबर १०१ मध्ये सोनिला शर्मा या ब्युटिशियन तरुणीचा संशयास्पद परिस्थितीत मृत्यू झाल्याची घटना समोर आली आहे. दुपारी २ वाजण्याच्या सुमारास पोलिसांना या घटनेची माहिती मिळाली. सोनिला हॉटेलच्या खोलीत बेशुद्ध अवस्थेत आढळून आली होती. तिला तातडीने रुग्णालयात दाखल करण्यासाठी नेण्यात आले; मात्र डॉक्टरांनी तपासणीनंतर तिला मृत घोषित केले. या प्रकरणाचा तपास पोलिसांनी सुरू केला असून, घटनेच्या वेळी सोनिलासोबत हॉटेलच्या खोलीत असलेल्या दीपक खंडेलवाल या व्यापाऱ्याचा शोध घेतला जात आहे.पोलिसांच्या माहितीनुसार, सोनिला शर्मा ही दीपक खंडेलवाल याच्यापूर्वी हॉटेलमध्ये दाखल झाली होती. त्यानंतर सुमारे एका तासाने दीपक रूम नंबर १०१ मध्ये पोहोचला. पाईपचा व्यवसाय करणारा दीपक या खोलीत जवळपास ४० मिनिटे थांबला आणि त्यानंतर तेथून बाहेर पडला. हॉटेलमधून निघाल्यानंतर त्यानेच कर्मचाऱ्यांना सोनिला खोलीत बेशुद्ध अवस्थेत पडल्याची माहिती दिली. त्यानंतर हॉटेल कर्मचाऱ्यांनी तातडीने तिला रुग्णालयात नेण्याची व्यवस्था केली; मात्र उपचार सुरू होण्यापूर्वीच तिचा मृत्यू झाला होता.

 

 

 

 

घटनेनंतर सोनिलाचा मृतदेह शवविच्छेदनासाठी पाठवण्यात आला. प्राथमिक तपासात तिचा मृत्यू गळफास लागल्यामुळे झाल्याचा अंदाज पोलिसांनी व्यक्त केला आहे. मात्र मृत्यूमागील नेमके कारण आणि त्या वेळी खोलीत नेमकी परिस्थिती काय होती, हे अद्याप स्पष्ट झालेले नाही. यासाठी पोलीस ‘शॉर्ट पोस्टमॉर्टम रिपोर्ट’ची प्रतीक्षा करत आहेत. दरम्यान, तपासात हॉटेलचे सीसीटीव्ही फुटेज पोलिसांच्या हाती लागले असून, त्यामध्ये सोनिलाला कारमधून रुग्णालयात नेले जात असल्याचे दिसत आहे. हॉटेलच्या आत आणि बाहेरील हालचाली तसेच संपूर्ण घटनाक्रम पडताळण्यासाठी पोलिसांकडून फुटेजची बारकाईने तपासणी केली जात आहे.या प्रकरणात सोनिलाच्या कुटुंबीयांचेही जबाब नोंदवले जात आहेत. शवविच्छेदनाची प्रक्रिया पूर्ण झाल्यानंतर कुटुंबीयांनी तिचा मृतदेह अंत्यसंस्कारासाठी राजगड येथे नेला आहे. दरम्यान, रूम नंबर १०१ मध्ये सोनिला बेशुद्ध होण्यापूर्वी नेमके काय घडले, याचा उलगडा करण्यासाठी दीपक खंडेलवालची चौकशी महत्त्वाची मानली जात आहे. पोलीस त्याचा शोध घेत असून, शवविच्छेदन अहवाल आणि दीपकची चौकशी झाल्यानंतरच या संशयास्पद मृत्यूमागील नेमके कारण स्पष्ट होण्याची शक्यता आहे. पोलिसांनी अद्याप कोणताही अंतिम निष्कर्ष काढलेला नसून सर्व शक्यता तपासल्या जात आहेत.