इंग्लंड-पाकिस्तान मालिकेत शतकाचा दुष्काळ

England-Pakistan series इंग्लंड आणि पाकिस्तान यांच्यातील २०२६ मधील तीन सामन्यांची कसोटी मालिका पाकिस्तानने ३-० अशी जिंकली असली, तरी या मालिकेची आणखी एका अनोख्या विक्रमामुळे क्रिकेटविश्वात चर्चा होत आहे. तब्बल १३८ वर्षांनंतर इंग्लंडमध्ये खेळल्या गेलेल्या तीन सामन्यांच्या कसोटी मालिकेत एकाही फलंदाजाला शतक झळकावता आले नाही. इंग्लंडमधील यापूर्वी अशी घटना १८८८ च्या ॲशेस मालिकेत घडली होती. मालिकेत इंग्लंडच्या फलंदाजांना पाकिस्तानच्या गोलंदाजांनी मोठ्या धावा करण्यापासून रोखले. इंग्लंडने पाच डावांत फलंदाजी केली, मात्र केवळ एकदाच त्यांच्या फलंदाजाला ८० धावांचा टप्पा पार करता आला. हॅरी ब्रुकने पहिल्या कसोटीच्या पहिल्या डावात ९१ धावांची खेळी केली आणि ती मालिकेतील इंग्लंडच्या फलंदाजाची सर्वोच्च धावसंख्या ठरली. जो रूटनेही या मालिकेत पाच डावांत दोन अर्धशतके केली, मात्र त्याला शतकाची संधी साधता आली नाही. यापूर्वी न्यूझीलंडविरुद्धच्या मालिकेतही रूटच्या बॅटमधून शतक आले नव्हते. विशेष म्हणजे, कसोटी क्रिकेटमध्ये सर्वाधिक अर्धशतकांचा सचिन तेंडुलकरचा विक्रम मोडणाऱ्या रूटलाही या मालिकेत शतक झळकावता आले नाही.

 

 

 

 

पाकिस्तानच्या फलंदाजांची कामगिरीही अपेक्षेप्रमाणे राहिली नाही. सहापैकी पाच डावांत पाकिस्तानच्या फलंदाजांनी समाधानकारक कामगिरी केली नाही. मात्र, मालिकेतील सर्वाधिक वैयक्तिक धावसंख्या पाकिस्तानच्या सौद शकीलने नोंदवली. लॉर्ड्स कसोटीच्या दुसऱ्या डावात त्याने ९७ धावांची खेळी केली आणि अवघ्या तीन धावांनी त्याचे शतक हुकले. त्याचबरोबर लॉर्ड्सवरील कसोटी सामन्याच्या चौथ्या डावात पाकिस्तानी फलंदाजाने केलेली ही सर्वोच्च धावसंख्या ठरली. पाकिस्तानचा माजी कसोटी कर्णधार शान मसूदने बर्मिंगहॅम येथे झालेल्या तिसऱ्या कसोटीच्या पहिल्या डावात ९५ धावा केल्या.

 

 

तीन सामन्यांच्या कसोटी मालिकेत एकही शतक न होणे ही क्रिकेटमध्ये दुर्मीळ घटना असली, तरी २०२६ मधील इंग्लंड-पाकिस्तान मालिका अशी कामगिरी करणारी इतिहासातील केवळ आठवी तीन सामन्यांची कसोटी मालिका ठरली. या मालिकेमुळे पाकिस्तानच्या नावावर आणखी एक नकोसा विक्रमही नोंदवला गेला आहे. तब्बल ७२ वर्षांनंतर पाकिस्तानला इंग्लंडमध्ये कसोटी मालिकेत क्लीन स्वीपचा सामना करावा लागला. पाकिस्तानने १९५४ मध्ये पहिल्यांदा इंग्लंडचा दौरा केला होता. त्यानंतर इंग्लंडमधील कसोटी मालिकेतील सर्व सामने गमावण्याची वेळ पाकिस्तानवर यापूर्वी कधीही आली नव्हती.