अमित शाह आणि शिंदे यांची बंद दाराआड भेट!

Meeting Amit Shah and Shinde केंद्रीय गृहमंत्री अमित शाह आणि महाराष्ट्राचे उपमुख्यमंत्री एकनाथ शिंदे यांची मुंबईतील सह्याद्री अतिथिगृहात भेट झाली. एशियाटिक सोसायटीच्या कार्यक्रमाला जाण्यापूर्वी झालेल्या या भेटीत दोघांमध्ये सुमारे अर्धा तास चर्चा झाली. या भेटीचा एक फोटोही समोर आला आहे. विशेष म्हणजे, अमित शाह आणि एकनाथ शिंदे एकाच गाडीतून एशियाटिक सोसायटीत आयोजित कार्यक्रमासाठी पोहोचले. मुख्यमंत्री देवेंद्र फडणवीस मात्र थेट कार्यक्रमस्थळी पोहोचले. एशियाटिक सोसायटीच्या कार्यक्रमात बोलताना अमित शाह यांनी भारतीय ज्ञानपरंपरेचे महत्त्व अधोरेखित केले.

 

 

 

 

एशियाटिक सोसायटीच्या इमारतीत प्रवेश करताना विनय यांनी केलेल्या टिप्पणीचा उल्लेख करत शाह म्हणाले की, पहिल्यांदाच एखादा गृहमंत्री एशियाटिक सोसायटीत येत असल्याचे सांगण्यात आले. मात्र, आपण येथे गृहमंत्री म्हणून नव्हे, तर हजारो वर्षांपासून सुरू असलेल्या भारतीय ज्ञानपरंपरेच्या प्रवाहाचा भाग म्हणून आलो असल्याचे त्यांनी स्पष्ट केले. एशियाटिक सोसायटी आगामी काळात ज्ञानपरंपरेची वाहक बनून ती देशभर पोहोचवण्याचे काम करेल, असा विश्वासही त्यांनी व्यक्त केला. भारतीय ज्ञानपरंपरेचे जतन करण्याचे महत्त्व सांगताना शाह यांनी राष्ट्राच्या अस्तित्वाशी त्याचा संबंध असल्याचे नमूद केले. आपल्या ज्ञानपरंपरेचे रक्षण करू न शकणारे राष्ट्र कितीही शक्तिशाली असले तरी त्याचा नाश होण्यास वेळ लागत नाही, असे ते म्हणाले.

भारताचे उदाहरण देताना त्यांनी सांगितले की, देश अनेक वर्षे गुलाम राहिला, तरीही भारतीय ज्ञानपरंपरेमुळे भारताला पूर्णपणे गुलाम बनवता आले नाही. नालंदा विद्यापीठ जाळता येऊ शकते; मात्र लोकांच्या मनात आणि विचारांमध्ये रुजलेले ज्ञान कोणीही संपवू शकत नाही, असेही शाह यांनी सांगितले. अमित शाह तीन दिवसांच्या मुंबई दौऱ्यावर आले आहेत. या दौऱ्यात ते एशियाटिक सोसायटीच्या कार्यक्रमासह हिंदीवर केंद्रित सहाव्या अखिल भारतीय राजभाषा संमेलनात सहभागी होणार आहेत. एशियाटिक सोसायटीमध्ये ‘श्री गणेश ध्यानारती’ नावाच्या हस्तलिखितांची विशेष प्रदर्शनीचे उद्घाटन ते करणार असून, ग्रंथालयालाही भेट देणार आहेत. हस्तलिखितांच्या जतनासाठी असलेल्या प्रयोगशाळेच्या कामाची पाहणी केल्यानंतर शाह उपस्थितांना संबोधित करतील. याशिवाय वांद्रे येथील रत्न व आभूषण निर्यात प्रोत्साहन परिषदेच्या पुरस्कार सोहळ्यालाही ते उपस्थित राहणार आहेत. त्यानंतर सोमवारी नवी मुंबईतील वाशी येथील सिडको प्रदर्शन केंद्रात हिंदीवर आधारित राजभाषा संमेलनात सहभाग घेतील. तसेच लालबागचा राजा यांचे दर्शनही घेणार आहेत.