आनंदवार्ता लाडली बहिणीसाठी १,८३५ कोटी

ladli behna yojana मध्य प्रदेशचे मुख्यमंत्री डॉ. मोहन यादव यांनी १३ सप्टेंबर रोजी लाडली बहनांना मोठी भेट देत राज्यातील १.२५ कोटींहून अधिक लाभार्थी महिलांच्या खात्यांमध्ये १,८३५ कोटी रुपयांची रक्कम थेट हस्तांतरित केली. आगर-माळवा येथे आयोजित कार्यक्रमात त्यांनी लाडली बहना योजनेचा ४०वा हप्ता वितरित केला. याचवेळी आगर-माळवा जिल्ह्यासाठी २२६ कोटी रुपयांच्या ३३ विकासकामांची घोषणा करत २८ कोटी रुपयांच्या १७ विकासकामांचे लोकार्पणही केले.

 

 

कार्यक्रमापूर्वी मुख्यमंत्री यादव यांनी बाबा बैजनाथ महादेव मंदिरात जाऊन भगवान भोलेनाथांचा अभिषेक केला. तसेच राज्यातील जनतेच्या सुख-समृद्धी, शांतता आणि कल्याणासाठी त्यांनी भगवान बैजनाथ महादेवाकडे प्रार्थना केली. पंतप्रधान नरेंद्र मोदी यांच्या वाढदिवसानिमित्त १७ सप्टेंबर रोजी प्रत्येक घरात दिवे लावून दीपावली साजरी करण्याचे आवाहनही त्यांनी जनतेला केले.

यावेळी मुख्यमंत्री यादव यांनी लाडली बहना योजनेवरून काँग्रेसवर जोरदार टीका केली. नलखेडा येथील देवीच्या आणि बाबा बैजनाथ यांच्या आशीर्वादामुळे ही भूमी पवित्र झाल्याचे सांगत त्यांनी रक्षाबंधनाच्या निमित्ताने बहिणीला भावाकडून मिळणारी भेट ही ईश्वराची कृपा असल्याचे म्हटले. पंतप्रधान नरेंद्र मोदी यांच्या नेतृत्वाखाली भारतीय जनता पक्षाची सरकार बहिणींना दर महिन्याला कोणतीही अडचण न येता १,५०० रुपये देत असल्याचे त्यांनी सांगितले.

योजना सुरू करण्याची घोषणा झाल्यापासून काँग्रेसने सातत्याने खोटा प्रचार केला. ही योजना टिकणार नाही, सरकार बहिणींना पैसे देऊ शकणार नाही आणि सरकारकडे त्यासाठी निधी नाही, असे काँग्रेसकडून सांगितले जात होते, असा दावा यादव यांनी केला. मात्र, आजपर्यंत त्यांच्या सरकारने सुमारे ५५ हजार कोटी रुपयांहून अधिक रक्कम बहिणींच्या खात्यांमध्ये पोहोचविल्याचे त्यांनी स्पष्ट केले. “आम्ही तुमच्याशी केलेले वचन पूर्ण करत आहोत,” असे सांगत या आर्थिक मदतीतून सरकारचा सांस्कृतिक भावही व्यक्त होत असल्याचे ते म्हणाले. दुर्गामाता, धरतीमाता आणि गोमाता यांनी भारतीय संस्कृतीचे सातत्याने पालनपोषण केले असून, मां बगलामुखीच्या आशीर्वादाने विकासाची कामे सुरू असल्याचेही त्यांनी नमूद केले.

बहिणींच्या आर्थिक आणि सामाजिक प्रगतीवरही मुख्यमंत्र्यांनी भर दिला. आज सुमारे चार लाख महिला लघुउद्योगांच्या माध्यमातून स्वतःच्या उद्योगांची उभारणी करत आहेत. स्वयं-सहायता बचत गटांमधून पुढे येत अनेक महिला आता उद्योजक बनत आहेत. पंतप्रधान नरेंद्र मोदी यांच्या नेतृत्वाखाली ‘नमो दीदी’, ‘ड्रोन दीदी’ आणि ‘लखपती दीदी’ यांसारख्या उपक्रमांतून महिला विविध क्षेत्रांत प्रगती करत असल्याचे यादव म्हणाले. कुटुंबाच्या प्रगतीसाठी महिला अथक परिश्रम घेतात आणि मातृशक्ती ही अत्यंत मोठी ताकद असल्याचे त्यांनी सांगितले.

तीजच्या निमित्ताने आपण महिलांच्या मध्ये आलो असल्याचे सांगताना यादव यांनी हरतालिका तीज आणि त्यानंतर येणाऱ्या गणेश चतुर्थीचा उल्लेख केला. कुटुंबाच्या कल्याणासाठी महिला रात्रभर जागून प्रार्थना करतात, त्यांच्या भावनांची जाणीव देवाला असते आणि म्हणूनच देवाच्या नावापूर्वी मातेचे नाव घेतले जाते, असे ते म्हणाले. “मातेचे नाव घेतले की भगवान मनमोकळेपणाने आशीर्वाद देतात,” असेही त्यांनी नमूद केले.

आगर-माळवा जिल्ह्यात झालेल्या विकासकामांचा उल्लेख करताना मुख्यमंत्री म्हणाले की, आज आगरची ओळख पूर्वीपेक्षा पूर्णपणे बदलली आहे. काँग्रेसच्या काळात येथे खराब आणि तुटलेल्या रस्त्यांची अवस्था होती; मात्र आता आगर-माळवा महानगराच्या दिशेने वाटचाल करत आहे. आगरहून अवघ्या ४० मिनिटांत उज्जैनला पोहोचता येते. सिंहस्थ कुंभमेळा जवळ येत असल्याने राजस्थानकडे जाणाऱ्या मार्गावर चारपदरी रस्ता उभारण्यात येणार आहे. या भागातून सुपर एक्स्प्रेसवेची जोडणीही उपलब्ध आहे. त्यामुळे दिल्ली-मुंबईसह इच्छित ठिकाणी सुमारे साडेसहा तासांत पोहोचता येईल, असा दावा त्यांनी केला.

पंतप्रधान नरेंद्र मोदी यांनी अनेक पिढ्यांचे भविष्य सुरक्षित केले असून, या भागाचा चेहरामोहरा बदलला आहे, असे यादव यांनी सांगितले. सरकारचे काम केवळ रस्ते, वीज आणि पाणी देण्यापुरते मर्यादित नसून महिलांच्या हातातही थेट पैसा पोहोचविण्याचा निर्णय घेण्यात आला आहे. महिलांच्या हातात पैसा गेल्यास त्या आपल्या कुटुंबाच्या कल्याणासाठी त्याचा वापर करतात. अनेक महिलांनी लाडली बहना योजनेतून मिळालेल्या पैशांची बचत करून शिवणयंत्र खरेदी केले, तर काहींनी ब्युटी पार्लर सुरू केले, असे त्यांनी सांगितले.

आगर-माळवा येथे बटाट्यावर आधारित उद्योग उभारण्याचा निर्णय सरकारने घेतला असून, या उद्योगाची गुंतवणूक सुमारे चार हजार कोटी रुपये असल्याचे मुख्यमंत्री यादव यांनी सांगितले. काँग्रेसच्या नेत्यांनी या प्रदेशासाठी काय केले, असा सवाल त्यांनी उपस्थित केला. काँग्रेसने केवळ आश्वासने दिली, मात्र त्याचे परिणाम दिसले नाहीत, अशी टीकाही त्यांनी केली. आगरमधील विद्यार्थ्यांसाठी लॉ कॉलेजची इमारत देत असल्याचेही त्यांनी जाहीर केले. विक्रमादित्य हे न्यायाचे देवता असल्याचा उल्लेख करत “आम्ही जे सांगितले ते करून दाखवले,” असे त्यांनी म्हटले. यावेळी त्यांनी उपस्थितांकडून ‘सच्चा वादा, पक्का काम, प्रेम से बोलो जय श्रीराम’ अशी घोषणाही करून घेतली.

काँग्रेसने भगवान रामाच्या कामातही अडथळे आणले, असा आरोप करत पंतप्रधान मोदी यांच्या नेतृत्वाखाली अनेक वर्षांपासून प्रलंबित प्रश्न मार्गी लागल्याचे यादव म्हणाले. केंद्र सरकारच्या योजनांमुळे महिलांना उज्ज्वला गॅस मिळाला, पक्की घरे मिळत आहेत, शाळेत दूरवर जाणाऱ्या मुलांना सायकली दिल्या जात आहेत आणि गुणवंत विद्यार्थ्यांना लॅपटॉप देण्यात आले आहेत, असे त्यांनी सांगितले.

“बहिणींच्या प्रगतीतच राज्याची प्रगती आहे,” असे स्पष्ट करत मुख्यमंत्री यादव यांनी यंदाचे वर्ष किसान कल्याण वर्ष म्हणून साजरे केले जात असल्याचे सांगितले. शेतकरी, महिला, युवा आणि गरीब या चार वर्गांच्या कल्याणासाठी सरकार काम करत आहे. या चारही घटकांचे कल्याण झाले की समाजाचे एकूण कल्याण आपोआप होते, असे ते म्हणाले. शेतकऱ्यांचे उत्पन्न वाढविण्यासाठी पशुपालन, कुक्कुटपालन, शेळीपालन यांसह विविध पर्यायांवर सरकार काम करत असल्याचे त्यांनी नमूद केले.

१९५६ मध्ये मध्य प्रदेशाची निर्मिती झाली तेव्हा २००२-०३ पर्यंत राज्यातील दरडोई वार्षिक उत्पन्न केवळ ११ हजार रुपये होते; आज ते १ लाख ६७ हजार रुपयांपर्यंत पोहोचल्याचा दावा मुख्यमंत्र्यांनी केला. आगर-माळवा परिसरात ३०० हून अधिक उद्योग उभारले जाणार असून, बैजनाथ धाम येथे १८ कोटी रुपयांची विकासकामे सुरू असल्याचेही त्यांनी सांगितले. याशिवाय आणखी ज्या मागण्या केल्या जातील, त्या पूर्ण करण्याचे आश्वासन त्यांनी दिले.

धार्मिक पर्यटनाच्या क्षेत्रात मध्य प्रदेशात मोठे परिवर्तन होत असल्याचे सांगताना यादव यांनी उज्जैनचे उदाहरण दिले. २०२२-२३ मध्ये उज्जैनमध्ये सुमारे ७० लाख भाविक येत होते; मात्र महाकाल लोकाची निर्मिती झाल्यानंतर गेल्या वर्षी येथे तब्बल आठ कोटी लोक आल्याचे त्यांनी सांगितले. मध्य प्रदेशाची लोकसंख्या साडेआठ कोटी असताना गेल्या वर्षी राज्यात २० कोटी लोकांनी भेट दिल्याचा दावाही त्यांनी केला. “जशी नियत, तशी बरकत आणि जशी दृष्टी, तशी सृष्टी,” असे ते म्हणाले. महिला सक्षमीकरण केवळ घोषणांमधून नव्हे, तर संकल्पशक्तीतून साध्य होऊ शकते. महिलांची प्रगती झाली नाही तर मध्य प्रदेशाची प्रगतीही शक्य नाही, असे त्यांनी ठामपणे सांगितले.

बदलत्या काळात महिला आता केवळ सरकारी योजनांचा लाभ घेणाऱ्या राहिलेल्या नसून, उत्पन्न निर्माण करणाऱ्या आणि लाभ कमावणाऱ्या बनत आहेत, असे यादव यांनी नमूद केले. महिलांची स्वप्ने पूर्ण करण्यासाठी सरकारकडे पुरेसा निधी उपलब्ध असल्याचेही त्यांनी सांगितले. पावसामुळे हेलिकॉप्टर उड्डाण करू शकत नसल्याची माहिती मिळाल्यानंतरही आपण दिलेले वचन पूर्ण करण्यासाठी आगर-माळवा येथे येण्याचा निर्णय घेतला, असे त्यांनी सांगितले. भगवान बैजनाथ सर्वांचे रक्षण करतील, असा विश्वास व्यक्त करत सरकार जनकल्याणासाठी सातत्याने काम करत असल्याचे त्यांनी स्पष्ट केले.

राज्यात पाच लाख किलोमीटर रस्त्यांचे काम सुरू असल्याचा दावा करत मुख्यमंत्र्यांनी काँग्रेसच्या काळात बंद झालेल्या रोडवेज बससेवेला आता ‘मुख्यमंत्री सुगम परिवहन सेवा’ या नावाने पुन्हा सुरू करण्यात येत असल्याचे सांगितले. २०३० पर्यंत गावागावांत १५ हजार बस धावतील, अशी माहिती त्यांनी दिली.

पंतप्रधान नरेंद्र मोदी यांच्या १७ सप्टेंबर रोजीच्या वाढदिवसानिमित्त गावांमध्ये ज्यांच्याकडे जमिनीचे पट्टे आहेत, त्यांच्या जमिनींची नोंदणी करण्याची मोहीम सुरू केली जाणार असल्याचेही मुख्यमंत्री यादव यांनी सांगितले. अशा लाभार्थ्यांची संख्या सुमारे ५० लाख असल्याचे त्यांनी नमूद केले. एवढ्या मोठ्या प्रमाणावर निर्णय घेणारे मध्य प्रदेश हे देशातील एकमेव राज्य असल्याचा दावा त्यांनी केला. राज्याच्या कल्याणासाठी सरकारकडून शक्य ते सर्व प्रयत्न केले जातील, असे सांगत त्यांनी १७ सप्टेंबर रोजी पंतप्रधान मोदी यांच्या वाढदिवसानिमित्त प्रत्येक घरात दिवे लावून दीपावली साजरी करण्याचे आवाहन केले. पंतप्रधान मोदी यांनी भारताची प्रतिष्ठा आणि प्रभाव जगभरात वाढविला असल्याचेही यादव यांनी यावेळी नमूद केले.