पावसाचे पुनरागमन अन् बाप्पा विराजमान

शहरातील कुंभारपुरा, बॅचलर रोड, साई मंदिर रोड, मगन संग्रहालय परिसरात गणेश मूर्ती विकत घेण्यासाठी सकाळपासूनच भक्तांची लगबग पाहायला मिळाली. दोन दिवस पाऊस असल्याने आज गणेश स्थापनेलाही पाऊस राहील, अशी भीती होती. परंतु, आज सकाळपासून आकाश निरभ्र होते. कमी पावसाअभावी जिल्ह्यातील खरीप हंगाम धोक्यात आला होता. येत्या चार-आठ दिवसांत पाऊस न पडल्यास तोंडी आलेला घास हिरावणार, अशी परिस्थिती निर्माण झाली होती. शेतकरी दररोज देवाकडे पावसासाठी प्रार्थना करीत होते. बळीराजाची साद ऐकत गणपती बाप्पाने विराजमान होण्याच्या दोन दिवसांपूर्वीच जिल्ह्यात पावसाने हजेरी लावली. यामुळे खरीप हंगामातील पिकांना संजीवनी मिळाली.