ठाकरेंचा रोख नेमका कोणाकडे

disha salian case दिशा सालियान मृत्यू प्रकरणाचा तपास केंद्रीय अन्वेषण विभागाकडून (CBI) सुरू असतानाच या प्रकरणाने पुन्हा एकदा राजकीय वर्तुळात खळबळ उडवली आहे. दिशा सालियान यांच्या वडिलांनी आपल्या जबाबात शिवसेना (उद्धव बाळासाहेब ठाकरे) पक्षाचे नेते आदित्य ठाकरे आणि पक्षप्रमुख उद्धव ठाकरे यांची नावे घेतल्याचा दावा केला जात आहे. मात्र, CBIकडून दाखल करण्यात आलेल्या FIRमध्ये या दोन्ही नेत्यांची नावे नसून अज्ञात व्यक्तींविरोधात गुन्हा दाखल करण्यात आल्याचे समोर आले आहे. त्यामुळे दिशा सालियान प्रकरणातील आरोप, तपास आणि राजकीय दावे यावरून नव्याने चर्चा सुरू झाली आहे.

 

 

दिशा सालियान यांच्या मृत्यूनंतर या प्रकरणात सातत्याने विविध आरोप केले जात आहेत. या प्रकरणाचा तपास CBIकडून करण्यात येत असून, न्यायालयानेही यासंदर्भात काही गंभीर प्रश्न उपस्थित केले आहेत. त्यातच दिशा यांच्या वडिलांकडून आदित्य ठाकरे आणि उद्धव ठाकरे यांची नावे घेतल्याचे सांगितले जात असले, तरी CBIच्या FIRमध्ये त्यांचा उल्लेख नसल्याने या बाबीकडे विशेष लक्ष वेधले गेले आहे.

 

 

या प्रकरणात भाजपचे नेते नितेश राणे यांच्याकडूनही सातत्याने आदित्य ठाकरे यांच्यावर आरोप केले जात आहेत. आदित्य ठाकरे यांचे नाव या प्रकरणाशी जोडले जात असताना भाजपच्या नेत्यांकडून विविध प्रतिक्रिया व्यक्त होत आहेत. या प्रकरणात आदित्य ठाकरे यांच्या अडचणी वाढू शकतात, असे दावेही राजकीय पातळीवर केले जात आहेत. मात्र, या सर्व आरोपांवर अंतिम निष्कर्ष तपास यंत्रणेच्या चौकशीनंतरच स्पष्ट होणार आहे.

दरम्यान, या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी सोशल मीडियावर केलेल्या एका पोस्टनेही राजकीय चर्चेला वेगळे वळण मिळाले आहे. “कावळ्याच्या शापाने गाय मरत नसते. तूर्तास एवढेच!” अशा आशयाची पोस्ट राज ठाकरे यांनी शेअर केली. दिशा सालियान प्रकरणाच्या पार्श्वभूमीवर राज ठाकरेंचा रोख नेमका कोणाकडे आहे, याबाबत राजकीय वर्तुळात तर्कवितर्क सुरू झाले आहेत.

राज ठाकरेंच्या या पोस्टचा संबंध काही जणांनी केंद्रीय गृहमंत्री अमित शाह यांच्या अलीकडील वक्तव्याशी जोडला आहे. नवी मुंबईतील भाषणात अमित शाह यांनी महाराष्ट्र हे बहुभाषिक राज्य असल्याचे म्हटले होते. त्यामुळे राज ठाकरेंनी आपल्या पोस्टमधून त्यांच्यावर निशाणा साधला असावा, अशी चर्चा सुरू झाली आहे. मात्र, राज ठाकरे यांनी आपल्या पोस्टमध्ये कोणाचेही नाव घेतलेले नसल्याने तिचा नेमका संदर्भ स्पष्ट झालेला नाही.

 

 

याच कार्यक्रमात मुख्यमंत्री देवेंद्र फडणवीस यांनी मराठी भाषेबाबत भाष्य करताना, “मराठी भाषा माझी आई आहे, तर हिंदी भाषा माझी मावशी आहे,” असे म्हटले होते. अमित शाह यांच्या बहुभाषिक महाराष्ट्रावरील वक्तव्यापासून मुख्यमंत्री फडणवीस यांच्या भाष्यापर्यंत आणि त्यानंतर राज ठाकरे यांच्या सोशल मीडिया पोस्टपर्यंत विविध राजकीय संदर्भ जोडले जात असल्याने या पोस्टभोवतीही चर्चेला उधाण आले आहे.

एकीकडे दिशा सालियान मृत्यू प्रकरणाचा CBI तपास सुरू आहे, तर दुसरीकडे या प्रकरणावरून राजकीय आरोप-प्रत्यारोपांना वेग आला आहे. दिशा यांच्या वडिलांच्या जबाबात ठाकरे पिता-पुत्राची नावे असल्याचा दावा आणि CBIच्या FIRमध्ये मात्र त्यांचा उल्लेख नसल्याने या प्रकरणातील तपासाची पुढील दिशा काय असेल, याकडे आता राजकीय वर्तुळासह सर्वांचे लक्ष लागले आहे.