आयसीसी क्रमवारीत भारताचा दबदबा!

icc rankings २०२६ च्या आशिया कपमध्ये दमदार कामगिरी करत विजेतेपदावर नाव कोरल्यानंतर भारतीय महिला क्रिकेटपटूंनी आता आयसीसीच्या टी-२० आंतरराष्ट्रीय क्रमवारीतही आपला ठसा उमटवला आहे. अंतिम सामन्यात भारताने श्रीलंकेचा ७२ धावांनी पराभव करत विक्रमी आठव्यांदा आशिया कपवर कब्जा केला. या स्पर्धेतील उत्कृष्ट कामगिरीचा थेट फायदा भारतीय खेळाडूंना ताज्या आयसीसी क्रमवारीत झाला असून, श्री चरणीने तर ऐतिहासिक कामगिरी नोंदवली आहे.

 

 

डावखुरी फिरकी गोलंदाज श्री चरणीने गोलंदाजांच्या क्रमवारीत कारकिर्दीतील सर्वोत्तम ८०४ रेटिंग गुण मिळवले आहेत. ८०० गुणांचा टप्पा पार करणारी ती पहिली भारतीय गोलंदाज ठरली आहे. तिने आशिया कपच्या अंतिम सामन्यात श्रीलंकेविरुद्ध चार बळी घेतले, तर संपूर्ण स्पर्धेत तिच्या नावावर १२ बळी जमा झाले. या कामगिरीमुळे ती महिला टी-२० आंतरराष्ट्रीय गोलंदाजांच्या क्रमवारीत अव्वल स्थानावर कायम आहे. या यादीत सर्वाधिक रेटिंग गुणांचा विक्रम ऑस्ट्रेलियाच्या मेगन शटच्या नावावर ८०६ गुणांसह आहे. श्री चरणी ८०४ गुणांसह दुसऱ्या, तर इंग्लंडची सोफी एक्लेस्टोन ८०२ गुणांसह तिसऱ्या क्रमांकावर आहे. दक्षिण आफ्रिकेची शबनीम इस्माईल ७८१ आणि ऑस्ट्रेलियाची शेली निट्शके ७८० गुणांसह पुढील क्रमांकावर आहेत.

श्री चरणीला आता अव्वल स्थानासाठी अनुभवी अष्टपैलू दीप्ती शर्माकडूनही कडवी स्पर्धा मिळणार आहे. आशिया कपमध्ये १४ बळी घेणाऱ्या दीप्तीने क्रमवारीत चार स्थानांची झेप घेत दुसरे स्थान पटकावले आहे. अंतिम सामन्यातही तिने १९ धावांत तीन बळी घेत भारताच्या विजयात महत्त्वाची भूमिका बजावली. फलंदाजीच्या क्रमवारीतही भारताला फायदा झाला असून, आशिया कपमध्ये २३६ धावा करत सर्वाधिक धावा करणारी शेफाली वर्मा एका स्थानाने वर येत सहाव्या क्रमांकावर पोहोचली आहे. स्पर्धेत तिची फलंदाजीची सरासरी ४७.२० इतकी होती. अष्टपैलूंच्या क्रमवारीतही शेफालीने पाच स्थानांची प्रगती करत १५वे स्थान मिळवले आहे. दरम्यान, ऑस्ट्रेलियाच्या बेथ मूनी आणि जॉर्जिया वॉल यांनी महिला टी-२० आंतरराष्ट्रीय फलंदाजांच्या क्रमवारीतील अनुक्रमे पहिले आणि दुसरे स्थान कायम राखले आहे.