गहलोत यांच्या प्रभागात भाजपाचा विजय

jodhpur civic election जोधपूर महानगरपालिका निवडणुकीच्या निकालांनी राजस्थानच्या राजकारणात अनेक धक्कादायक संकेत दिले आहेत. शहरातील विविध प्रभागांमध्ये दिग्गज नेत्यांच्या प्रभावक्षेत्राला धक्का बसला असून, अनेक ठिकाणी अनपेक्षित निकाल लागले आहेत. सर्वाधिक लक्षवेधी निकाल माजी मुख्यमंत्री अशोक गहलोत यांच्या मतदारसंघाशी संबंधित प्रभागात लागला. गहलोत यांनी स्वतः मतदान केलेल्या प्रभागात भाजपच्या उमेदवाराने विजय मिळवत काँग्रेसला मोठा धक्का दिला आहे.

 

 

अशोक गहलोत यांनी ज्या प्रभागात स्वतः मतदान केले होते, तेथेच भाजपच्या उमेदवाराने बाजी मारली. याशिवाय गहलोत कुटुंबाशी संबंधित मानले जाणारे जसवंत सिंह कच्छवाह यांचाही भाजपच्या विजय सिंह यांनी एक हजारहून अधिक मतांच्या फरकाने पराभव केला. त्यामुळे गहलोत यांच्या प्रभावक्षेत्रातील या निकालाची राजकीय वर्तुळात विशेष चर्चा सुरू झाली आहे.

जोधपूर महानगरपालिका निवडणुकीत माजी महापौर कुंती देवडा यांनाही पराभवाचा सामना करावा लागला. भाजपच्या निकिता यांनी त्यांचा २५९ मतांनी पराभव केला. काँग्रेसचे जिल्हाध्यक्ष ओंकार वर्मा यांनाही विजय मिळवता आला नाही. भाजपचे मेघराज लोहिया यांनी त्यांना पराभूत केले.

दरम्यान, भाजपलाही काही महत्त्वाच्या जागांवर धक्का बसला आहे. महापौरपदाचे संभाव्य दावेदार मानले जाणारे भाजपचे कुमार देवेंद्र यांचा काँग्रेसचे माजी जिल्हाध्यक्ष नरेश जोशी यांनी पराभव केला. त्यामुळे भाजपच्या गोटातही या निकालाची चर्चा आहे.

माजी मुख्यमंत्री गहलोत यांच्या प्रभावक्षेत्रानंतर केंद्रीय मंत्री गजेंद्र सिंह शेखावत यांच्या बालेकिल्ल्यातही राजकीय समीकरणे बदलल्याचे दिसून आले. शेखावत यांच्या प्रभागात भाजपच्या भावना रूप यांचा काँग्रेसच्या पुष्पा गहलोत यांनी पराभव केला. त्याचबरोबर शेखावत यांच्या निकटवर्तीयांमध्ये गणले जाणारे रविंद्र सिंह मामडोली यांनाही पराभव पत्करावा लागला. काँग्रेसचे गिरधारी सिंह यांनी त्यांचा ८०० हून अधिक मतांनी पराभव केला.

जोधपूर महानगरपालिका निवडणुकीतील हे निकाल काँग्रेस आणि भाजप या दोन्ही पक्षांसाठी राजकीयदृष्ट्या महत्त्वाचे मानले जात आहेत. विशेषतः प्रमुख नेत्यांच्या प्रभावक्षेत्रातील प्रभागांमध्ये झालेल्या उलटफेरामुळे शहरातील राजकीय समीकरणे बदलण्याचे संकेत मिळाले आहेत. आगामी काळात या निकालांचा परिणाम जोधपूरच्या राजकारणावर दिसून येण्याची शक्यता असून, पुढील विधानसभा निवडणुकीतही महानगरपालिका निवडणुकीतील या निकालांचे पडसाद उमटण्याची शक्यता व्यक्त केली जात आहे.