हॉस्पिटलमधील फोटो पाहून चाहत्यांची चिंता

disco shanthi दाक्षिणात्य चित्रपटसृष्टीतील लोकप्रिय अभिनेत्री आणि नृत्यांगना डिस्को शांती यांच्या हॉस्पिटलमधील एका फोटोने त्यांच्या चाहत्यांची चिंता वाढवली आहे. १९८० आणि १९९०च्या दशकात नृत्य आणि ग्लॅमरस भूमिकांमुळे विशेष लोकप्रिय झालेल्या डिस्को शांती यांनी सोशल मीडियावर हॉस्पिटलमधील छायाचित्र शेअर केले आहे. या छायाचित्रात त्यांच्या नाकातून एक वैद्यकीय ट्यूब लावलेली दिसत आहे. मात्र, आपल्या प्रकृतीविषयी त्यांनी अद्याप कोणतीही सविस्तर माहिती दिलेली नाही.

 

 

डिस्को शांती यांनी हा फोटो शेअर करताना ‘बॅक टू होम’ असा छोटासा संदेश लिहिला आहे. त्यामुळे त्या उपचारानंतर घरी परतल्याचे स्पष्ट झाले आहे. मात्र, त्यांना नेमका कोणता त्रास झाला होता, कोणत्या कारणामुळे त्यांना रुग्णालयात दाखल करण्यात आले होते किंवा त्यांच्यावर कोणते उपचार करण्यात आले, याबाबत त्यांनी कोणताही खुलासा केलेला नाही. त्यामुळे हॉस्पिटलमधील त्यांचा फोटो पाहून चाहत्यांमध्ये त्यांच्या आरोग्याबाबत काळजी निर्माण झाली आहे. त्यांच्या सोशल मीडिया पोस्टच्या कमेंट सेक्शनमध्ये अनेक चाहत्यांनी त्यांच्या लवकर प्रकृती सुधारण्यासाठी शुभेच्छा दिल्या आहेत.

डिस्को शांती यांनी १९८० आणि १९९०च्या दशकात तमिळसोबतच तेलुगू, कन्नड, मल्याळम आणि हिंदी चित्रपटांमध्येही काम केले. विशेषतः नृत्यप्रधान गाणी आणि ग्लॅमरस भूमिका यामुळे त्यांना मोठी लोकप्रियता मिळाली होती. आपल्या कारकिर्दीत त्यांनी त्या काळातील अनेक आघाडीच्या कलाकारांसोबत काम केले.

अभिनेता श्रीहरी यांच्याशी विवाह झाल्यानंतर डिस्को शांती यांनी चित्रपटसृष्टीपासून अंतर घेतले. २०१३ मध्ये श्रीहरी यांचे निधन झाले. त्यानंतर त्या मनोरंजनविश्वापासून आणखी दूर राहिल्या. आता तब्बल २८ वर्षांनंतर ‘पुल्ला’ या प्रोजेक्टच्या माध्यमातून त्या पुन्हा अभिनय क्षेत्रात पदार्पण करणार असल्याचे वृत्त आहे. त्यामुळे त्यांच्या कमबॅकचीही चाहत्यांमध्ये उत्सुकता निर्माण झाली आहे.

दरम्यान, डिस्को शांती यांचा मुलगा मेघांश श्रीहरी हादेखील तेलुगू चित्रपटसृष्टीत अभिनेता म्हणून कारकीर्द सुरू करत आहे. अशा परिस्थितीत डिस्को शांती यांच्या हॉस्पिटलमधील फोटोमुळे त्यांच्या चाहत्यांचे लक्ष त्यांच्या प्रकृतीकडे वेधले गेले आहे. सध्या त्यांनी आपण घरी परतल्याचे सोशल मीडिया पोस्टद्वारे सांगितले असले, तरी त्यांच्या प्रकृतीविषयी अधिकृत आणि सविस्तर माहिती अद्याप समोर आलेली नाही.

१९८३ मध्ये ‘वसंतमे वरुगा’ या तमिळ चित्रपटातून डिस्को शांती यांनी अभिनय क्षेत्रात पदार्पण केले. त्यानंतर त्यांनी तमिळ, तेलुगू, कन्नड, मल्याळम, हिंदी आणि ओडिया यांसह विविध भाषांमधील चित्रपटांमध्ये काम केले. आपल्या कारकिर्दीत त्यांनी शेकडो चित्रपटांमध्ये भूमिका साकारल्या असून, विशेषतः त्यांच्या नृत्यप्रधान गाण्यांची त्या काळात मोठी चर्चा होती.