ममता विरुद्ध ऋतब्रत; तृणमूलची लढाई तीव्र

Mamata vs. Ritabrata तृणमूल काँग्रेसमधील निवडणूक चिन्ह आणि पक्षाच्या नावावरून सुरू असलेल्या वादाला आता नवे वळण मिळाले आहे. निवडणूक आयोगाच्या अंतरिम आदेशानंतर ऋतब्रत बॅनर्जी यांच्या नेतृत्वाखालील बंडखोर गटाने नव्या राजकीय पक्षासाठी तीन पर्यायी नावे निश्चित केली आहेत. ‘नॅशनलिस्ट तृणमूल काँग्रेस’, ‘डेमोक्रॅटिक तृणमूल काँग्रेस’ आणि ‘पश्चिम बंगाल तृणमूल काँग्रेस’ या तीन नावांची यादी शुक्रवारी निवडणूक आयोगाकडे सादर करण्यात आली.ऋतब्रत बॅनर्जी यांनी पक्षाच्या नेत्यांसोबत ऑनलाइन बैठक घेतल्यानंतर नव्या नावांसह निवडणूक चिन्हांचीही निवड केली. बंडखोर गटाने ‘फळा’, ‘लिफाफा’ आणि ‘टॉर्च’ ही तीन चिन्हे पसंत केली असून, त्याबाबतची माहितीही आयोगाला देण्यात आली आहे. दरम्यान, तृणमूल काँग्रेसच्या संस्थापक आणि अध्यक्ष ममता बॅनर्जी यांनीही आयोगाच्या अंतरिम आदेशाला उत्तर देताना आपल्या पसंतीची तीन पक्षनावे आणि निवडणूक चिन्हांची माहिती सादर केली आहे. आयोगाने दिलेल्या आदेशावर ममता बॅनर्जी यांनी तीव्र आक्षेप नोंदवला असून, गुरुवारी रात्री ११ वाजून ३६ मिनिटांनी त्यांनी आपले उत्तर पाठवल्याची माहिती सूत्रांनी दिली.

 

 

 

 

गुरुवारी १७ सप्टेंबर रोजी दोन्ही गटांची बाजू ऐकल्यानंतर निवडणूक आयोगाने अंतरिम आदेश जारी केला. त्यानुसार ममता बॅनर्जी गट आणि ऋतब्रत बॅनर्जी गटाला ‘ऑल इंडिया तृणमूल काँग्रेस’ हे नाव तसेच त्याचे निवडणूक चिन्ह वापरता येणार नाही. दोन्ही गटांना शुक्रवारी १८ सप्टेंबर रोजी सकाळी ११ वाजेपर्यंत पर्यायी पक्षनाव आणि निवडणूक चिन्ह सुचवण्याचे निर्देश देण्यात आले होते. निर्धारित वेळेपूर्वीच दोन्ही गटांनी आयोगाकडे आपली नावे आणि चिन्हे सादर केली. आयोगाच्या निर्णयाचे ऋतब्रत गटाने स्वागत केले, तर ममता बॅनर्जी यांनी त्याला तीव्र विरोध दर्शवला. पश्चिम बंगालमधील नंदीग्राम आणि रेजिनगर विधानसभा मतदारसंघातील पोटनिवडणुकीच्या पार्श्वभूमीवर हा वाद अधिक महत्त्वाचा ठरला आहे. या दोन्ही मतदारसंघांत ६ ऑक्टोबर रोजी पोटनिवडणूक होणार असून, ममता बॅनर्जी गट आणि ऋतब्रत गटाने स्वतंत्र उमेदवार मैदानात उतरवले आहेत. आता पक्षाचे नाव आणि निवडणूक चिन्ह कोणत्या गटाला मिळणार, याकडे लक्ष लागले आहे.