पडद्यावरील ‘मुसाफिर कॅफे’ आता प्रत्यक्षात

vikrant massey आपल्या अभिनयाने प्रेक्षकांमध्ये स्वतंत्र ओळख निर्माण करणारा अभिनेता विक्रांत मेस्सी सध्या ‘मुसाफिर कॅफे’ या वेब सीरिजमुळे चर्चेत आहे. या सीरिजच्या यशानंतर विक्रांत आता व्यवसायाच्या क्षेत्रातही पाऊल ठेवण्याच्या तयारीत असल्याची माहिती समोर आली आहे. विशेष म्हणजे, ज्या प्रोजेक्टमध्ये त्याने महत्त्वाची भूमिका साकारली, त्याच्याशी तो आता एका वेगळ्या माध्यमातून जोडला जाणार आहे.

 

 

मिळालेल्या माहितीनुसार, विक्रांत मेस्सी हिमाचल प्रदेश आणि उत्तराखंड येथे ‘मुसाफिर कैफे’ या नावाने दोन कॅफे सुरू करणार आहे. ‘व्हरायटी’ने दिलेल्या वृत्तानुसार, या दोन्ही कॅफेंच्या बांधकामाला सुरुवात झाली आहे. मालिकेत दिसणाऱ्या कॅफेच्या धर्तीवरच या नव्या कॅफेंची रचना केली जाणार असल्याचे सांगण्यात येत आहे. त्यामुळे वेब सीरिजमध्ये काल्पनिक स्वरूपात उभी राहिलेली ‘मुसाफिर कॅफे’ची दुनिया आता प्रत्यक्ष अनुभवता येणार आहे.

या प्रस्तावित कॅफेंचे वैशिष्ट्य केवळ खाद्यपदार्थ किंवा आतिथ्यसेवेपुरते मर्यादित राहणार नाही. येथे कलाकारांसाठी सुमारे 20 खोल्यांची आर्टिस्ट रेसिडेन्सी उभारण्याची योजना आहे. देश-विदेशातून येणाऱ्या कलाकारांना या ठिकाणी वास्तव्यास राहून त्यांच्या सर्जनशील प्रकल्पांवर काम करता येणार आहे. त्यामुळे कॅफेसोबतच कलाकारांना त्यांच्या कल्पनांना आकार देण्यासाठी एक स्वतंत्र क्रिएटिव्ह स्पेस उपलब्ध होण्याची शक्यता आहे.

‘मुसाफिर कॅफे’ या वेब सीरिजमध्ये विक्रांत मेस्सीने चंदर ही मध्यवर्ती भूमिका साकारली आहे. कॉर्पोरेट क्षेत्रातील धावपळीचे आयुष्य मागे सोडून डोंगरांमध्ये शांतपणे जगण्याचे आणि स्वतःचे कॅफे सुरू करण्याचे चंदरचे स्वप्न आहे. त्यामुळे विक्रांतच्या आगामी कॅफे प्रकल्पाचा संबंध सीरिजमधील त्याच्या व्यक्तिरेखेच्या स्वप्नाशी जोडला जात असल्याचे चित्र आहे.

सीरिजची कथा चंदरसोबतच वेदिका पिंटो या महत्त्वाकांक्षी आणि स्वतंत्र विचारांच्या तरुणीभोवतीही केंद्रित आहे. मुंबईत मोठी सिव्हिल लॉयर होण्याचे ध्येय असलेली वेदिका कौटुंबिक जबाबदाऱ्या आणि स्वतःच्या आयुष्याविषयीचे निर्णय यांच्यात समतोल साधण्याचा प्रयत्न करते. अभिनेत्री महिमा मकवाना हिने या मालिकेत महत्त्वाची भूमिका साकारली असून, मसुरीमध्ये चंदरसोबत ‘मुसाफिर कॅफे’ चालवताना तिचे पात्र दाखवण्यात आले आहे.

वेगवेगळ्या काळातील घटनांमधून पुढे जाणाऱ्या या सीरिजमध्ये प्रेम, स्वप्ने, नातेसंबंध आणि स्वतःच्या आयुष्याचा मार्ग निवडण्याची धडपड यांचा वेध घेण्यात आला आहे. अशा पार्श्वभूमीवर मालिकेतील कथानकाचा महत्त्वाचा भाग असलेले ‘मुसाफिर कॅफे’ आता प्रत्यक्ष आकाराला येत असल्याने विक्रांत मेस्सीच्या चाहत्यांमध्येही या प्रकल्पाबद्दल उत्सुकता निर्माण झाली आहे.