‘तुकाराम मुंढेंची नक्कल करण्याचं धाडस कोण करेल?
निलेश साबळेंचं मिश्कील उत्तर चर्चेत
Total Views |
मुंबई
nilesh sable महाराष्ट्राचे अन्न आणि औषध प्रशासनाचे (एफडीए) आयुक्त तुकाराम मुंढे सध्या त्यांच्या धडाकेबाज कारवायांमुळे चर्चेत आहेत. त्यांच्या कामाची चर्चा आता प्रशासन आणि सर्वसामान्यांपुरती मर्यादित न राहता मनोरंजन क्षेत्रातही होताना दिसत आहे. ‘चला हवा येऊ द्या’चे माजी सूत्रसंचालक आणि अभिनेते निलेश साबळे यांनी तुकाराम मुंढे यांच्या व्यक्तिमत्त्वावर भाष्य करताना केलेली मिश्कील टिप्पणी सध्या चर्चेचा विषय ठरली आहे.
‘लोकमत फिल्मी’ला दिलेल्या मुलाखतीत निलेश साबळे यांना तुकाराम मुंढे एखाद्या वेळी ‘चला हवा येऊ द्या’च्या मंचावर आले असते, तर त्यांच्या व्यक्तिरेखेची भूमिका स्किटमध्ये कोण साकारू शकले असते, असा प्रश्न विचारण्यात आला. त्यावर निलेश यांनी सुरुवातीला, “तुम्हीच अंदाज बांधा,” असे मिश्कील उत्तर दिले. त्यानंतर मात्र त्यांनी स्वतःच या प्रश्नाचे उत्तर देत, आपल्या अंगकाठीमुळे आपण काही प्रमाणात तुकाराम मुंढे यांच्यासारखे दिसू शकलो असतो, असे सांगितले.
मात्र, केवळ दिसण्यातील साम्यामुळे मुंढे यांची भूमिका साकारणे हा पर्याय त्यांनी स्वीकारला नसता, असेही निलेश यांनी स्पष्ट केले. ‘चला हवा येऊ द्या’मध्ये एखादा सेलिब्रिटी कार्यक्रमात सहभागी झाला की त्याची नक्कल करण्याची जबाबदारी अनेकदा भाऊ कदम यांच्यावर असायची. भाऊ कदम यांनी केलेली नक्कल पाहून संबंधित सेलिब्रिटी स्वतःही हसायचा आणि त्यामुळे स्किट अधिक रंगतदार व्हायचे, असे निलेश यांनी सांगितले.
तुकाराम मुंढे कार्यक्रमात आले असते, तर मात्र त्यांच्या व्यक्तिमत्त्वाची थेट नक्कल करण्याऐवजी त्यांच्यावर आधारित काही वेगळ्या धाटणीचे स्किट करण्याचा विचार केला असता, असे निलेश यांनी नमूद केले. यामागचे कारण स्पष्ट करताना त्यांनी मुंढे यांच्याबद्दल आपल्याला ‘आदरयुक्त भीती’ वाटत असल्याचे मिश्कीलपणे सांगितले. त्यामुळे त्यांच्या व्यक्तिरेखेची नक्कल करण्याचे धाडस कोण करेल, असा सवालही त्यांनी गमतीने केला.
तुकाराम मुंढे सध्या अन्न आणि औषध प्रशासनाकडून सुरू असलेल्या विविध कारवायांमुळे चर्चेत आहेत. हॉटेल्स, कॅन्टीन, रुग्णालये तसेच अन्नपदार्थांमधील भेसळीशी संबंधित प्रकरणांमध्ये एफडीएकडून करण्यात येणाऱ्या कारवायांकडे राज्याचे लक्ष वेधले गेले आहे. याच कारवायांचा संदर्भ देत निलेश साबळे यांनी मुंढे यांच्या कामाचे कौतुक केले.
अन्न आणि आरोग्याशी संबंधित प्रश्न हे थेट सर्वसामान्यांच्या दैनंदिन जीवनाशी जोडलेले आहेत, असे निलेश यांनी सांगितले. तुकाराम मुंढे यांच्यासारखे अधिकारी कार्यरत असतील, तर सर्वसामान्य नागरिकांनी घाबरण्याचे कारण नाही, अशा शब्दांत त्यांनी आपल्या भावना व्यक्त केल्या.
दरम्यान, तुकाराम मुंढे यांच्या व्यक्तिमत्त्वाबाबत निलेश साबळे यांनी केलेली ही मिश्कील टिप्पणी आणि त्यांच्या कामाबद्दल व्यक्त केलेले कौतुक सोशल मीडियावर चर्चेत आले आहे. त्यामुळे मनोरंजन क्षेत्रातील कलाकाराच्या नजरेतून मांडलेले मुंढे यांचे हे वेगळे चित्रही सध्या लक्ष वेधून घेत आहे.