बँक ग्राहकांनो लक्ष द्या! २१ ते २७ सप्टेंबरदरम्यान ६ दिवस सुट्टी

Bank closed for 6 days. पुढील आठवड्यात म्हणजेच २१ ते २७ सप्टेंबर २०२६ या कालावधीत बँकेशी संबंधित महत्त्वाचे काम असल्यास ग्राहकांनी आधीच नियोजन करणे आवश्यक आहे. या सात दिवसांच्या कालावधीत देशातील विविध भागांमध्ये प्रादेशिक सुट्या आणि साप्ताहिक सुट्यांमुळे एकूण सहा दिवस बँकांचे कामकाज बंद राहणार आहे. मात्र, या सर्व सुट्या देशभर एकाच वेळी लागू नसतील. स्थानिक सण आणि विशेष दिवसांनुसार वेगवेगळ्या शहरांमध्ये बँका बंद राहणार आहेत.

 

 

 

 

२१ सप्टेंबर रोजी श्रीमंत शंकरदेव जयंती आणि श्री नारायण गुरु समाधी दिनानिमित्त गुवाहाटी, कोची आणि तिरुवनंतपुरम येथील बँक शाखा बंद राहतील. २२ सप्टेंबर रोजी कर्मा पूजेमुळे रांची येथे बँकांना सुट्टी असेल. त्यानंतर २३ सप्टेंबर रोजी महाराजा हरि सिंह यांच्या जयंतीनिमित्त जम्मू आणि श्रीनगरमधील बँकांचे कामकाज बंद राहणार आहे. २५ सप्टेंबर रोजी इंद्रजात्रा सणामुळे गंगटोक, सिक्कीम येथील बँक शाखांना सुट्टी असेल.

 

यानंतर २६ सप्टेंबर रोजी महिन्याचा चौथा शनिवार असल्याने देशभरातील सर्व बँका बंद राहतील. २७ सप्टेंबर रोजी रविवार असल्यामुळे देशभर बँकांचे नियमित कामकाज होणार नाही. त्यामुळे २१ ते २७ सप्टेंबरदरम्यान एकूण सहा दिवस विविध भागांमध्ये बँका बंद राहणार आहेत. बँक शाखा बंद असल्या तरी ग्राहकांना डिजिटल व्यवहारांसाठी अडचण येणार नाही. एटीएममधून पैसे काढणे, शिल्लक तपासणे, मोबाइल बँकिंग आणि ऑनलाइन बँकिंग सेवा सुरू राहतील. गुगल पे, फोनपे आणि पेटीएमच्या माध्यमातून पैसे पाठवणे, बिले भरणे आणि रिचार्ज करणे यांसारखे व्यवहारही करता येतील. मात्र, रोख रक्कम जमा करणे, धनादेश वटवणे किंवा लॉकरशी संबंधित कामे करायची असल्यास बँक शाखा सुरू होईपर्यंत प्रतीक्षा करावी लागेल.