कडक नियम; संवेदनशील ठिकाणी फोटो-व्हिडिओसाठी पूर्वपरवानगी बंधनकारक

Bhubaneswar Police ओडिशातील भुवनेश्वर कमिश्नरेट पोलिसांनी संवेदनशील आणि महत्त्वाच्या प्रतिष्ठानांच्या सुरक्षेबाबत पोलिस कर्मचाऱ्यांसाठी कडक निर्देश जारी केले आहेत. 19 सप्टेंबर 2026 रोजी जारी करण्यात आलेल्या आदेशानुसार, अशा महत्त्वाच्या ठिकाणी कर्तव्यावर तैनात असलेल्या पोलिसांना सक्षम अधिकाऱ्याची पूर्वपरवानगी घेतल्याशिवाय कोणत्याही इलेक्ट्रॉनिक उपकरणाद्वारे फोटो काढता येणार नाहीत किंवा व्हिडिओ रेकॉर्ड करता येणार नाहीत.

 

 

अलीकडच्या काळात काही पोलिस कर्मचाऱ्यांकडून त्यांच्या ड्युटी, तैनाती आणि कार्यस्थळाशी संबंधित फोटो तसेच व्हिडिओ सोशल मीडिया आणि इतर सार्वजनिक प्लॅटफॉर्मवर शेअर केले जात असल्याचे पोलिसांच्या निदर्शनास आले. अशा व्हिडिओ किंवा छायाचित्रांमधून महत्त्वाच्या प्रतिष्ठानांची रचना, संवेदनशील ठिकाणे किंवा सुरक्षेशी संबंधित माहिती नकळत सार्वजनिक होण्याची शक्यता आहे. त्यामुळे सुरक्षेचा प्रश्न निर्माण होऊ शकतो, तसेच गोपनीय माहिती बाहेर जाण्याचा धोका वाढू शकतो, असे कमिश्नरेट पोलिसांनी स्पष्ट केले आहे.

नव्या आदेशानुसार, महत्त्वाच्या प्रतिष्ठानांमध्ये ड्युटीवर असलेल्या पोलिस कर्मचाऱ्यांना कोणत्याही कारणासाठी फोटो काढायचा किंवा व्हिडिओ रेकॉर्ड करायचा असल्यास संबंधित सक्षम अधिकाऱ्याची आधी परवानगी घेणे आवश्यक राहणार आहे. ही बंदी केवळ सोशल मीडिया किंवा एखाद्या विशिष्ट उद्देशापुरती मर्यादित नसून, कोणत्याही कारणासाठी फोटो किंवा व्हिडिओ तयार करण्यापूर्वी परवानगी घेणे बंधनकारक करण्यात आले आहे.

या आदेशाच्या कक्षेत लोक भवन, लोक सेवा भवन, श्री लिंगराज मंदिर, ओडिशा विधानसभा, ओडिशा उच्च न्यायालय, भारतीय रिझर्व्ह बँकेची ओडिशा शाखा आणि आर्मरी यांसारख्या महत्त्वाच्या व संवेदनशील प्रतिष्ठानांचा समावेश करण्यात आला आहे. या ठिकाणी तैनात पोलिस कर्मचाऱ्यांना छायाचित्रण किंवा व्हिडिओ रेकॉर्डिंग करण्यापूर्वी सक्षम अधिकाऱ्याची मंजुरी घेणे आवश्यक असेल.

सेंट्री ड्युटीवर असलेल्या पोलिस कर्मचाऱ्यांसाठीही आदेशात स्पष्ट सूचना देण्यात आली आहे. कर्तव्य बजावत असताना सेंट्रीला मोबाइल फोन वापरण्यास पूर्णपणे मनाई करण्यात आली आहे. याशिवाय, संबंधित महत्त्वाच्या प्रतिष्ठानांच्या प्रभारी अधिकाऱ्यांवरही या नियमांच्या अंमलबजावणीची जबाबदारी सोपवण्यात आली आहे. त्यांच्या अखत्यारीतील पोलिस कर्मचाऱ्यांकडून आदेशाचे पालन होत आहे की नाही, तसेच फोटो किंवा व्हिडिओ तयार करण्यासारख्या अनधिकृत हालचाली होत नाहीत ना, याची खातरजमा करण्याचे निर्देश देण्यात आले आहेत.

कमिश्नरेट पोलिसांनी सर्व डीसीपींनाही आपल्या नियंत्रणाखालील पोलिस कर्मचाऱ्यांपर्यंत हा आदेश पोहोचवण्याचे निर्देश दिले आहेत. नियमांचे उल्लंघन झाल्यास तातडीने आवश्यक कारवाई करण्यासही सांगण्यात आले आहे. आदेशाचे उल्लंघन गांभीर्याने घेतले जाईल आणि संबंधित नियमांनुसार कारवाई केली जाईल, असा स्पष्ट इशारा पोलिस प्रशासनाने दिला आहे.

ड्युटी आणि तैनातीशी संबंधित फोटो-व्हिडिओ सोशल मीडिया तसेच इतर सार्वजनिक माध्यमांवर शेअर होत असल्याच्या पार्श्वभूमीवर हा आदेश जारी करण्यात आला आहे. संवेदनशील आणि महत्त्वाच्या प्रतिष्ठानांशी संबंधित सुरक्षा माहिती अनवधानाने सार्वजनिक होऊ नये, हा या नव्या निर्देशांचा मुख्य उद्देश असल्याचे कमिश्नरेट पोलिसांनी स्पष्ट केले आहे. (इनपुट : शुभम कुमार)