मूग-चण्यांना द्या झणझणीत तडका; अशी बनवा भन्नाट चाट!

make this fantastic chaat सकाळच्या नाश्त्यात प्रथिनांचा समावेश केल्यास दिवसभर शरीराला ऊर्जा मिळण्यास आणि मन सक्रिय ठेवण्यास मदत होते. त्यामुळे आरोग्य तज्ज्ञ प्रथिनयुक्त नाश्त्याला महत्त्व देतात. मोड आलेले मूग आणि काळे चणे यापासून तयार केलेली चटपटीत चाट हा त्यासाठी एक स्वादिष्ट पर्याय ठरू शकतो. नेहमीची उकडलेली किंवा साधी चाट खाऊन कंटाळा आला असेल, तर भारतीय मसाले, चटण्या आणि लिंबाच्या रसामुळे या चाटला वेगळीच चव मिळते.

 

 

ही चाट तयार करण्यासाठी एक कप मोड आलेले मूग, एक कप मोड आलेले किंवा उकडलेले काळे चणे, एक बारीक चिरलेला कांदा, एक टोमॅटो, एक हिरवी मिरची, अर्धी काकडी आणि पाव कप बारीक चिरलेली कोथिंबीर घ्यावी. यासोबत एक चमचा गोड-आंबट चिंचेची चटणी, एक चमचा तिखट हिरवी चटणी, एक चमचा लिंबाचा रस, अर्धा चमचा भाजलेल्या जिऱ्याची पूड, अर्धा चमचा चाट मसाला, पाव चमचा लाल तिखट, पाव चमचा काळे मीठ आणि चवीनुसार साधे मीठ आवश्यक आहे.

 

कच्चे मोड खाल्ल्याने पचनाचा त्रास होत असल्यास मोड आलेले मूग आणि चणे गरम पाण्यात तीन ते चार मिनिटे हलके शिजवून घ्यावेत. त्यानंतर एका मोठ्या भांड्यात मोड आणि चणे घेऊन त्यात कांदा, टोमॅटो, काकडी आणि हिरवी मिरची मिसळावी. दुसरीकडे काळे मीठ, साधे मीठ, भाजलेल्या जिऱ्याची पूड, चाट मसाला आणि लाल तिखट एकत्र करावे. हे मिश्रण चाटमध्ये घालून त्यात हिरवी चटणी, गोड-आंबट चिंचेची चटणी आणि लिंबाचा रस मिसळावा. सर्व साहित्य व्यवस्थित एकजीव करून चाट वाटीत काढावी आणि वरून ताजी कोथिंबीर भुरभुरून वाढावी.