रशियावर युक्रेनचा मोठा ड्रोन हल्ला

moscow hit in major attack रशिया आणि युक्रेनमधील संघर्ष अधिक तीव्र होत असतानाच युक्रेनने रशियावर मोठ्या प्रमाणावर ड्रोन हल्ले केल्याचा दावा रशियन अधिकाऱ्यांनी केला आहे. असोसिएटेड प्रेसच्या (AP) वृत्तानुसार, या हल्ल्यात 1,000 हून अधिक ड्रोनचा वापर करण्यात आल्याचे रशियन अधिकाऱ्यांनी म्हटले आहे. रशियाची राजधानी मॉस्कोलाही या हल्ल्याचे लक्ष्य करण्यात आले. मॉस्कोवर झालेल्या हा आतापर्यंतच्या सर्वात मोठ्या ड्रोन हल्ल्यांपैकी एक असल्याचे शहराचे महापौर सर्गेई सोब्यानिन यांनी म्हटले आहे.

 

 

रशियात संसदीय निवडणुकीचा तिसरा आणि अंतिम दिवस सुरू असतानाच हा हल्ला झाला. मॉस्कोच्या दिशेने येणारे 450 ड्रोन पाडण्यात आल्याचा दावा सोब्यानिन यांनी केला आहे. मात्र, या हल्ल्यात मॉस्को ऑइल रिफायनरी आणि एका निवासी इमारतीचे नुकसान झाल्याचे त्यांनी सांगितले. हा हल्ला अभूतपूर्व असल्याचे वर्णन करताना, निवडणूक प्रक्रियेत अडथळा निर्माण करण्याचा प्रयत्न असल्याचा आरोपही सोब्यानिन यांनी केला. मात्र, शत्रूचा हा प्रयत्न अपयशी ठरल्याचे त्यांनी म्हटले आहे.

मॉस्को परिसराचे गव्हर्नर आंद्रेई वोरोब्योव यांच्या माहितीनुसार, ड्रोन हल्ल्यात दोन जणांचा मृत्यू झाला असून 20 जण जखमी झाले आहेत. मृतांमध्ये 74 वर्षीय पुरुष आणि 44 वर्षीय महिलेचा समावेश असल्याचे त्यांनी सांगितले.

दरम्यान, युक्रेनचे राष्ट्राध्यक्ष वोलोदिमीर झेलेन्स्की यांनीही या हल्ल्याबाबत माहिती दिली आहे. त्यांच्या म्हणण्यानुसार, युक्रेनमध्ये तयार करण्यात आलेल्या फ्लेमिंगो आणि पेलिकन क्षेपणास्त्रांसह विविध प्रकारची क्षेपणास्त्रे आणि ड्रोन या कारवाईत वापरण्यात आले. तेल आणि लॉजिस्टिक्सशी संबंधित सुविधांना लक्ष्य करण्यात आल्याचे झेलेन्स्की यांनी सांगितले. रशियाच्या युद्धयंत्रणेवर आर्थिक दबाव निर्माण करणे हा या हल्ल्यांचा उद्देश असल्याचे त्यांनी म्हटले आहे.

दुसरीकडे, रशियाच्या संरक्षण मंत्रालयाने या हल्ल्याबाबत आणखी मोठा आकडा दिला आहे. देशभरात 1,100 युक्रेनी ड्रोन पाडल्याचा दावा रशियन संरक्षण मंत्रालयाने केला आहे. या कारवाईत रशियाच्या विविध भागांसह रशियाच्या ताब्यात असलेल्या क्रिमिया द्वीपकल्पावर आणि काळ्या समुद्राच्या परिसरात उडणाऱ्या ड्रोनचाही समावेश असल्याचे मंत्रालयाने म्हटले आहे.या मोठ्या ड्रोन हल्ल्याची पार्श्वभूमी रशियातील संसदीय निवडणुकीशी जोडली जात आहे. युक्रेनविरुद्ध युद्ध सुरू झाल्यानंतरची ही रशियातील पहिली युद्धकाळातील संसदीय निवडणूक असल्याचे वर्णन केले जात आहे. या निवडणुकीत राष्ट्राध्यक्ष व्लादिमीर पुतिन यांच्या धोरणांना विरोध करणाऱ्या राजकीय पर्यायांची उपस्थिती अत्यंत मर्यादित राहिली आहे.दरम्यान, रशियाने युद्धानंतर स्वतःमध्ये विलीन केल्याचा दावा केलेल्या युक्रेनच्या चार प्रदेशांमध्येही मतदान घेतले आहे. या प्रदेशांच्या सर्व भागांवर रशियाचे नियंत्रण नसतानाही तेथे मतदान प्रक्रिया राबवण्यात आली. 2014 मध्ये रशियाने ताब्यात घेतलेल्या क्रिमियामध्येही मतदान झाले. युक्रेनने या प्रदेशांमध्ये रशियाकडून घेण्यात येणाऱ्या निवडणुकांना बेकायदेशीर ठरवले आहे.

रशिया-युक्रेन संघर्षाच्या पार्श्वभूमीवर दोन्ही देशांकडून एकमेकांच्या प्रदेशांवर हल्ले सुरू आहेत. काही दिवसांपूर्वी रशियाने युक्रेनची राजधानी कीवजवळील बुचा जिल्ह्यात मोठा हल्ला केल्याचे वृत्त आले होते. या हल्ल्यात 37 जणांचा मृत्यू झाल्याचे सांगण्यात आले होते.

मॉस्कोसह रशियातील विविध भागांवर झालेल्या ताज्या ड्रोन हल्ल्यामुळे संघर्षाचे स्वरूप आणखी तीव्र झाल्याचे दिसत आहे. मात्र, हल्ल्यात वापरण्यात आलेल्या ड्रोनची अचूक संख्या, त्यातून झालेल्या नुकसानीची व्याप्ती आणि दोन्ही बाजूंकडून करण्यात आलेल्या दाव्यांची स्वतंत्र पडताळणी अद्याप झालेली नाही.