पिक परिस्थिती जाणून घेण्यासाठी मंत्री संजय सावकारे शेताच्या बांधावर

minister sanjay savkare पावसातील मोठा खंड, अनियमित पर्जन्यमान आणि त्याचा पिकांच्या वाढीवर झालेला प्रतिकूल परिणाम यामुळे अडचणीत सापडलेल्या शेतकर्‍यांच्या पिकांची वस्तुस्थिती जाणून घेण्यासाठी राज्याचे वस्त्रोद्योग मंत्री तथा जिल्ह्याचे सहपालकमंत्री संजय सावकारे यांनी मलकापूर तालुयातील बेलाड व मोताळा येथील निपाणा व शैलापुर येथे शेताच्या बांधावर जाऊन प्रत्यक्ष पाहणी केली. यावेळी त्यांनी बाधित पिकांची पाहणी करून शेतकर्‍यांशी संवाद साधला आणि त्यांच्या अडचणी व समस्या जाणून घेतल्या.

पावसातील खंडामुळे पिकांची झालेली अवस्था शेतकर्‍यांकडून जाणून घेताना राज्यमंत्री सावकारे यांनी प्रत्यक्ष शेतातील परिस्थितीची पाहणी केली. पिकांची वाढ, पाण्याची उपलब्धता तसेच अनियमित पावसाचा झालेला परिणाम याबाबत त्यांनी शेतकर्‍यांकडून माहिती घेतली. बुलढाणा जिल्ह्यातील पीक परिस्थिती व नुकसानीचा आढावा प्रशासकीय यंत्रणेकडून घेण्यात आला आहे. अकोला येथील कृषी विद्यापीठात कृषिमंत्र्यांच्या उपस्थितीत झालेल्या बैठकीतही जिल्ह्यासह राज्यातील पीक परिस्थितीवर सविस्तर चर्चा करण्यात आली आहे. पावसातील मोठ्या खंडामुळे जिल्ह्यातील सुमारे ७० ते ८० टक्के पिकांवर गंभीर परिणाम झाला असून, उर्वरित पिकांचे अस्तित्वही पुढील पावसावर अवलंबून आहे असे त्यांनी सांगितले. वेळेवर पाऊस न मिळणे तसेच त्यानंतर झालेल्या अनियमित पावसामुळे शेतकर्‍यांसमोर मोठे आव्हान निर्माण झाले आहे.

 

मलकापूर व मोताळा तालुयासह जिल्ह्यातील पीक परिस्थितीचा आणि झालेल्या नुकसानीचा सविस्तर आढावा घेऊन अहवाल राज्य शासनाकडे सादर करण्यात येणार आहे. राज्यातील एकूण पीक परिस्थितीचा आढावा घेतल्यानंतर बाधित शेतकर्‍यांना आवश्यक तो दिलासा देण्यासाठी शासन स्तरावर योग्य निर्णय घेण्यात येईल, असे आश्वासन संजय सावकारे यांनी दिले. शेतकर्‍यांच्या अडचणी जाणून घेण्यासाठी शासन व प्रशासनाकडून प्रत्यक्ष पाहणी करण्यात येत असून, पीक नुकसानीबाबत आवश्यक कार्यवाही करण्यात येत असल्याचेही त्यांनी स्पष्ट केले. यावेळी आ. चैनसुख संचेती, माजी आमदार विजयराज शिंदे, उपविभागीय अधिकारी संतोष शिंदे, तहसीलदार समाधान सोनोने, स्थानिक लोकप्रतिनिधी, प्रशासकीय अधिकारी तसेच परिसरातील शेतकरी मोठ्या संख्येने उपस्थित होते.