सोमनूर त्रिवेणी संगमाला पर्यटनस्थळाचा दर्जा द्या

somnur-sangam-tourism-status-गडचिरोली जिल्ह्यातील सिरोंचा तालुक्यातील सोमनूर त्रिवेणी संगम परिसराला पर्यटनस्थळाचा अधिकृत दर्जा देऊन या भागाचा सर्वांगीण विकास करावा, तसेच असरअली ते सोमनूर संगम या सुमारे 10 किलोमीटर मार्गाला दुहेरी रस्त्याची मंजुरी देऊन काम तातडीने सुरू करावे, अशी मागणी सामाजिक कार्यकर्ते डॉ. श्रीकांत सुगरवार यांनी जिल्हाधिकार्‍यांकडे निवेदनाद्वारे केली आहे. हे निवेदन तहसीलदार सिरोंचा यांच्यामार्फत जिल्हाधिकारी कार्यालयाकडे सादर करण्यात आले आहे.

 

 

सोमनूर त्रिवेणी संगम हे नैसर्गिक आणि भौगोलिकदृष्ट्या अत्यंत वैशिष्ट्यपूर्ण ठिकाण असून, या परिसरात महाराष्ट्र, तेलंगणा आणि छत्तीसगड या तीन राज्यांच्या सीमा एकत्र येतात. याच ठिकाणी इंद्रावती आणि गोदावरी या दोन मोठ्या नद्यांचे मिलन होत असल्याने या परिसराला विशेष महत्त्व प्राप्त झाले आहे. सभोवतालच्या डोंगररांगा, विस्तीर्ण नदीपात्र आणि निसर्गरम्य वातावरणामुळे सोमनूर परिसर पर्यटकांसाठी आकर्षणाचे केंद्र बनण्याची मोठी क्षमता बाळगून आहे. मात्र, आवश्यक पायाभूत सुविधा आणि चांगल्या रस्त्याअभावी या नैसर्गिक पर्यटनस्थळाचा अपेक्षित विकास झालेला नाही.

असरअली ते सोमनूर संगम या मार्गाची अवस्था अत्यंत खराब असल्याने पर्यटक तसेच स्थानिक नागरिकांना मोठ्या अडचणींचा सामना करावा लागत आहे. या मार्गावरून प्रवास करताना वाहने खराब होण्याच्या घटना घडत असून, अनेकदा रस्ता वाहतुकीसाठी अडचणीचा ठरत आहे. त्यामुळे सोमनूर संगमापर्यंत पर्यटकांना सहज आणि सुरक्षितपणे पोहोचता यावे यासाठी सुमारे 10 किलोमीटरचा हा मार्ग दुहेरी रस्त्याने विकसित करण्याची आवश्यकता असल्याचे निवेदनात नमूद करण्यात आले आहे.

सोमनूर संगमाला पर्यटनस्थळाचा दर्जा मिळाल्यास या परिसराच्या विकासाला मोठी चालना मिळू शकते. पर्यटकांसाठी आवश्यक मूलभूत सुविधा, निवास व्यवस्था, स्वच्छता, सुरक्षा, वाहनतळ आणि इतर सुविधा उपलब्ध करून दिल्यास येथे पर्यटकांची संख्या वाढू शकते. तसेच योग्य नियोजन करून बोटिंगची सुविधा उपलब्ध केल्यास पर्यटकांना तीन राज्यांच्या सीमावर्ती परिसरासह इंद्रावती आणि गोदावरी नद्यांच्या संगमाचा निसर्गरम्य अनुभव घेता येऊ शकतो. यामुळे स्थानिक पातळीवर पर्यटनाशी संबंधित व्यवसायांना चालना मिळून युवकांसाठी रोजगाराच्या नव्या संधी निर्माण होण्याची शक्यता आहे.