दत्तक प्रक्रियेत चार बालकांना मिळाले कायदेशीर पालकत्व

gadchiroli बाल न्याय (मुलांची काळजी व संरक्षण) अधिनियम, 2015 व सुधारित अधिनियम, 2021 मधील तरतुदींनुसार गडचिरोली जिल्ह्यातील दत्तक प्रक्रियेची चार प्रकरणे निकाली काढण्यात आली आहेत. जिल्हाधिकारी अविश्यांत पंडा यांच्या आदेशान्वये चार बालकांच्या नाते अंतर्गत दत्तक प्रक्रियेला कायदेशीर मान्यता देण्यात आली आहे.

 

 

 

महिला व बाल विकास विभागाच्या मार्गदर्शक सूचना तसेच मुंबई उच्च न्यायालयाच्या रिट याचिका क्र. 1085/2023 मधील 4 मे 2026 रोजीच्या आदेशाच्या अनुषंगाने ही कार्यवाही करण्यात आली. बाल न्याय (मुलांची काळजी व संरक्षण) अधिनियमाच्या कलम 56 (2) तसेच दत्तक नियमनावली, 2022 मधील तरतुदींनुसार जिल्हा बाल संरक्षण कक्षाकडे प्राप्त प्रकरणांची आवश्यक प्रशासकीय व कायदेशीर पडताळणी करण्यात आली.

 

 

या प्रक्रियेत संबंधित प्रकरणांतील आवश्यक दस्तऐवज, कायदेशीर कागदपत्रे आणि दत्तक प्रक्रियेसाठी निर्धारित अटी व निकषांची सविस्तर छाननी करण्यात आली. आवश्यक निकषांची पूर्तता करणार्‍या चार प्रकरणांमध्ये कायदेशीर प्रक्रिया पूर्ण करून दत्तक आदेश जारी करण्यात आले. या आदेशामुळे संबंधित बालकांच्या दत्तक संबंधांना कायदेशीर मान्यता प्राप्त झाली असून, त्यांना त्यांच्या नातेवाईकांकडे कायदेशीर पालकत्व मिळाले आहे.

 

 

त्यामुळे बालकांना स्थिर व सुरक्षित कौटुंबिक वातावरणात संगोपन मिळण्यासोबतच त्यांच्या हिताचे संरक्षण करण्याच्या दृष्टीने दत्तक संबंधांना कायदेशीर आधार प्राप्त झाला आहे. ही कार्यवाही जिल्हाधिकारी अविश्यांत पंडा यांच्या मार्गदर्शनाखाली करण्यात आली. प्रकरणांची आवश्यक पडताळणी व प्रशासकीय कार्यवाही जिल्हा महिला व बाल विकास अधिकारी दीपक बानाईत, जिल्हा बाल संरक्षण अधिकारी अविनाश गुरनुले आणि बाल संरक्षण अधिकारी प्रियंका आसूटकर यांनी केली.