इराणसोबत भारताने उभे राहावे ; प्रकाश आंबेडकरांचा केंद्र सरकारवर निशाणा

prakash ambedkar भारताने सध्याच्या पश्चिम आशियातील संघर्षाच्या पार्श्वभूमीवर इराणसोबत ठामपणे उभे राहावे, असे आवाहन वंचित बहुजन आघाडीचे अध्यक्ष ॲड. प्रकाश आंबेडकर यांनी केले. येत्या १ ऑक्टोबर रोजी मुंबईतील छत्रपती शिवाजी महाराज टर्मिनस येथे ‘आम्ही इराणसोबत’ या भूमिकेसाठी मोर्चाचे आयोजन करण्यात आल्याचे त्यांनी सांगितले. या आंदोलनात राज्यातील जनतेने मोठ्या संख्येने सहभागी व्हावे, असे आवाहनही त्यांनी केले. या मोर्चाची घोषणा यापूर्वीही करण्यात आली आहे.

 

 

 

 

देशभरात प्रभावी विरोधी पक्ष शिल्लक राहिलेला नाही, अशी परिस्थिती असल्याचे सांगत आंबेडकर यांनी विरोधकांवरही टीका केली. जागतिक आणि प्रादेशिक प्रश्नांकडे विरोधी पक्ष जाणीवपूर्वक दुर्लक्ष करत असल्याचा आरोप त्यांनी केला.

पश्चिम आशियातील संघर्षाचा परिणाम भारताच्या अर्थव्यवस्थेवर आणि सामान्य नागरिकांच्या घरगुती बजेटवर होऊ शकतो, असे आंबेडकर म्हणाले. कच्च्या तेलाच्या दरवाढीमुळे महागाई वाढण्याची शक्यता असल्याने भारताला स्वस्त आणि स्थिर तेलपुरवठा मिळण्यासाठी प्रयत्न होणे आवश्यक असल्याचे त्यांनी सांगितले. इराणकडून कच्चे तेल उपलब्ध झाल्यास त्याचा फायदा सामान्य नागरिकांना होऊ शकतो, अशी भूमिका त्यांनी मांडली.

भारताचे इराणसोबत ऐतिहासिक संबंध असल्याचा दावा करत, संकटकाळात इराणने भारताला साथ दिल्याचे आंबेडकर म्हणाले. त्यामुळे सध्याच्या परिस्थितीत भारताने इराणच्या बाजूने उभे राहावे, अशी मागणी त्यांनी केली.

केंद्र सरकारच्या परराष्ट्र धोरणावर टीका करताना आंबेडकर यांनी इस्रायल-अमेरिका संबंध आणि भारताच्या भूमिकेवरही प्रश्न उपस्थित केले. तसेच पंतप्रधान नरेंद्र मोदी यांनी BRICSमध्ये झालेल्या चर्चेबाबत देशाला अधिक स्पष्ट माहिती द्यावी, अशी मागणी त्यांनी केली.

अभिजीत दीपके यांच्याबाबत बोलताना प्रकाश आंबेडकर म्हणाले की, सध्या अस्तित्वात असलेल्या आणि राजकीय भूमिका स्पष्ट केलेल्या पक्षांसोबत जाण्याचा आमचा विचार आहे.prakash ambedkar ज्यांनी अद्याप कोणतीही स्पष्ट राजकीय भूमिका घेतलेली नाही, त्यांच्यासोबत जाण्याचा प्रश्नच उद्भवत नाही.

दरम्यान, सध्याच्या राजकीय पक्षांपैकी ज्यांनी आपली भूमिका स्पष्ट केली आहे, त्यांच्यासोबत जाण्याची भूमिका असल्याचेही आंबेडकर यांनी सांगितले. शेतकरी, आदिवासी विद्यार्थी आणि महागाईच्या प्रश्नांवरही त्यांनी सरकारवर टीका केली. आदिवासी विद्यार्थ्यांच्या DBTच्या प्रश्नावर सरकारने विद्यार्थ्यांच्या अडचणी समजून घेऊन निर्णय घ्यावा, अशी भूमिका त्यांनी मांडली.

भारताची अधिकृत भूमिका मात्र संघर्षाच्या प्रश्नांवर संवाद आणि राजनैतिक मार्गाने तोडगा काढण्याची असून, पंतप्रधान नरेंद्र मोदी यांनी इराणचे राष्ट्राध्यक्ष मसूद पेझेश्कियान यांच्यासोबत अलीकडील चर्चेत शांतता, नौवहनाचे स्वातंत्र्य आणि समुद्री व्यापाराच्या सुरक्षेवर भर दिला आहे.