विद्यापीठ परीक्षा व सेवा शुल्क वाढीला विराेध

amravati-university-senate संत गाडगेबाबा अमरावती विद्यापीठद्वारा १४ वर्षांनंतर करण्यात आलेल्या परीक्षा शुल्कासह अन्य सेवाशुल्क वाढीस आज सिनेटमध्ये सदस्यांनी जोरदार विराेध केला. सिनेट सदस्य कैलास चव्हाण यांच्या प्रश्नावर झालेल्या चर्चेत सिनेट सदस्य व आमदार प्रताप अडसड यांनी देखील हा प्रश्न लावून धरला. सर्वांच्या भावना लक्षात घेता पीठासीन सभापती कुलगुरू डाॅ. मिलिंद बारहाते यांनी शुल्कवाढीच्या फेरविचारासाठी हा मुद्दा पुन्हा विद्या परिषदेकडे पाठविण्याचा निर्णय घेतला.

 

सदस्य प्रा. प्रवीण रघुवंशी यांनी देखील शुल्कवाढ थांबविण्याची मागणी केली. विद्यापीठाच्या वतीने परीक्षा व मूल्यमापन मंडळाचे संचालक डाॅ. नितीन काेळी यांनी विद्यापीठाने १२ वर्षानंतर शुल्कवाढ केल्याचे सांगितले. आतापर्यंत विद्यार्थ्यांवर काेणताही भार नव्हता. परंतु, आता शुल्कवाढ करण्यात आल्याचे ते म्हणाले. यावर अशी वाढ एकदम करण्यापेक्षा टप्प्याटप्याने करण्याची सूचना सदस्यांनी केली. सदस्य डाॅ. रवींद्र मुंद्रे यांनीसुद्धा अचानक शुल्कवाढ केल्याने विद्यार्थी बेजार झाल्याचे सांगितले. विद्यापीठाच्या रुक्मिणीनगर येथील ज्ञातस्त्राेत केंद्राच्या कामाला गती देऊन हे केंद्र लवकरात लवकर सुरू करण्याची ग्वाही सभापतींनी दिली. कैलास चव्हाण यांनी हा मुद्दा उपस्थित केला होता.

अधिसभेच्या सुरुवातीला राष्ट्रगीत, वंदे मातरम्, महाराष्ट्र गीत, विद्यापीठ गीत गायिले जाते. नव्या कायद्यानुसार वंदे मातरम् या राष्ट्रीय गीताच्या संपूर्ण कडव्यांचे गायन अपेक्षित आहे. पण, आजच्या अधिसभेत वंदे मातरम् या गीताची दोनच पदे गायिली गेली. एकप्रकारे या राष्ट्रीय गीताचा हा अवमानच झाला. सदर बाब सिनेट सदस्य गिरीश शेरेकर, सुनील तिपट्ट यांनी सभापतींच्या लक्षात आणून दिली. त्यांनी घडलेल्या प्रकाराची गंभीर दखल घेऊन पुढच्या सभेपासून वंदे मातरम् गीताच्या संपूर्ण कडव्यांचे गायन होईल, असे निर्देश दिले.