‘स्पर्धा नको, भागीदारी हवी’

Xi Jinping from American soil चीनचे राष्ट्राध्यक्ष शी जिनपिंग बुधवारी अमेरिकेत दाखल झाल्यानंतर चीन-अमेरिका संबंधांबाबत महत्त्वपूर्ण भूमिका मांडली. दोन्ही देशांनी परस्परांशी स्पर्धा करण्याऐवजी भागीदारीच्या दिशेने वाटचाल करावी, असे शी यांनी म्हटले. बदलत्या जागतिक परिस्थितीत चीन आणि अमेरिका आपल्या संबंधांना पुढे नेण्यासाठी योग्य मार्ग शोधू शकतात, असा विश्वासही त्यांनी व्यक्त केला.शी जिनपिंग पत्नी पेंग लियुआन यांच्यासह अमेरिकेत पोहोचले. जॉइंट बेस अँड्र्यूज येथे अमेरिकेचे राष्ट्राध्यक्ष डोनाल्ड ट्रम्प आणि त्यांच्या पत्नी मेलानिया ट्रम्प यांनी त्यांचे स्वागत केले. या वेळी अमेरिकी हवाई दलाच्या बँडकडून वादन करण्यात आले, तसेच चीन आणि अमेरिकेचे ध्वजही फडकवण्यात आले.

 

 

 

 

१९६२ नंतर प्रथमच अमेरिकेच्या राष्ट्राध्यक्षांनी लष्करी तळावर एखाद्या परदेशी नेत्याचे स्वतः उपस्थित राहून स्वागत केल्याचे वृत्त आहे. १९६२ मध्ये तत्कालीन अमेरिकी राष्ट्राध्यक्ष जॉन एफ. केनेडी यांनी ब्रिटनचे तत्कालीन पंतप्रधान हॅरोल्ड मॅकमिलन यांचे स्वागत केले होते.चीनच्या अधिकृत वृत्तसंस्था शिन्हुआने दिलेल्या माहितीनुसार, शी जिनपिंग यांनी आपल्या लेखी संदेशातून अमेरिकी जनतेला चिनी जनतेच्या वतीने शुभेच्छा दिल्या. चीन आणि अमेरिका हे दोन्ही महान देश असून दोन्ही देशांच्या जनतेमध्ये दीर्घकाळापासून मैत्रीपूर्ण संबंध असल्याचे त्यांनी नमूद केले. दोन्ही देशांचे हितसंबंधही एकमेकांशी मोठ्या प्रमाणात जोडलेले असल्याचे शी यांनी सांगितले.

 

चीन आणि अमेरिकेने परस्परांशी प्रतिस्पर्धा करण्याऐवजी भागीदारीचा मार्ग स्वीकारण्याची गरज असल्याचे शी यांनी स्पष्ट केले. चीनच्या महान पुनरुज्जीवनाचे उद्दिष्ट आणि अमेरिकेला पुन्हा महान बनवण्याचे ध्येय एकमेकांसोबत पुढे नेता येऊ शकते, असे त्यांनी म्हटले. दोन्ही देश एकमेकांना प्रगतीसाठी मदत करू शकतात आणि त्यातून संपूर्ण जगाच्या कल्याणासाठी योगदान देता येईल, अशी भूमिका त्यांनी मांडली. दरम्यान, शी जिनपिंग आणि डोनाल्ड ट्रम्प यांच्यात होणाऱ्या चर्चेत अनेक महत्त्वाच्या विषयांवर चर्चा होण्याची शक्यता आहे. यामध्ये व्यापार शुल्क, तंत्रज्ञान, कृत्रिम बुद्धिमत्ता, लष्करी संबंध तसेच पश्चिम आशियातील संघर्षाचा समावेश आहे. याशिवाय रशिया-युक्रेन युद्ध, अंतराळातील शस्त्रास्त्र स्पर्धा आणि अमेरिकेकडून तैवानला केली जाणारी शस्त्रविक्री हे मुद्देही चर्चेत येण्याची शक्यता आहे.