१८ वर्षाचा मुलगा...वडिलांच्या डोक्यात गोळी झाडून हत्या

chandigarh crime प्रेयसीशी लग्न करण्यासाठी आई-वडिलांकडे हट्ट धरलेल्या १८ वर्षीय तरुणाने वादातून वडिलांची गोळी झाडून हत्या केल्याची धक्कादायक घटना चंदिगढच्या सेक्टर २२ परिसरात घडली. यानंतर पुरावे नष्ट करण्याच्या प्रयत्नात त्याने आईचाही गळा आवळून हत्या करण्याचा प्रयत्न केला. मात्र, आईने प्रसंगावधान राखत त्याच्या तावडीतून स्वतःची सुटका केली आणि शेजाऱ्यांना मदतीसाठी हाक दिली. या प्रकरणी पोलिसांनी आरोपी मुलाला अटक केली असून पुढील तपास सुरू आहे.

 

 

नितीन सिंह (४५) असे मृत पोलीस हेड कॉन्स्टेबलचे नाव आहे. ते चंदिगढ पोलीस मुख्यालयातील अकाऊंट्स विभागात कार्यरत होते. सेक्टर २२ येथील सरकारी निवासस्थानी त्यांचा रक्ताच्या थारोळ्यात मृतदेह आढळल्यानंतर पोलिसांना घटनेची माहिती देण्यात आली. घटनास्थळी पोहोचलेल्या पोलिसांनी पाहणी केली असता गुन्ह्यात वापरलेले गावठी पिस्तूलही जप्त करण्यात आले.पोलिसांच्या प्राथमिक माहितीनुसार, नितीन सिंह यांचा मुलगा अरमान याला आपल्या प्रेयसीशी तातडीने विवाह करायचा होता. त्यासाठी तो काही दिवसांपासून आई-वडिलांकडे लग्नासाठी आग्रह धरत होता. मात्र, भारतात विवाहासाठी पुरुषाचे कायदेशीर वय २१ वर्षे असल्याने त्याच्या पालकांनी त्याला आणखी तीन वर्षे प्रतीक्षा करण्यास सांगितले होते. कायदेशीर वय पूर्ण झाल्यानंतर लग्न लावून देण्याचे आश्वासनही त्यांनी दिले होते. तरीही अरमान आपल्या मागणीवर ठाम होता.२४ सप्टेंबर रोजी गुरुवारी सायंकाळी याच मुद्द्यावरून पुन्हा घरात वाद झाला. तपासात अरमानने लग्नासाठी वडिलांकडे १० लाख रुपयांची मागणी केल्याची माहिती समोर आली आहे. लग्नासाठी लागणारे पैसे आणि विवाहाचा मुद्दा यावरून वाद वाढल्यानंतर अरमानने घरातील गावठी पिस्तूल बाहेर काढले आणि नितीन सिंह यांच्या डोक्यात गोळी झाडली. गोळीबारात त्यांचा जागीच मृत्यू झाला.

वडिलांवर गोळीबार केल्यानंतर अरमानने आईचा गळा आवळून तिचीही हत्या करण्याचा प्रयत्न केला. मात्र, आईने त्याच्या तावडीतून सुटका करून घेतली आणि थेट घराच्या छतावर धाव घेतली. तेथून तिने आरडाओरड करत शेजाऱ्यांना घटनेची माहिती दिली. त्यानंतर पोलिसांना या घटनेची माहिती मिळाली आणि त्यांनी घटनास्थळी धाव घेतली.

दरम्यान, वडिलांची हत्या केल्यानंतर पोलिसांची दिशाभूल करण्यासाठी अरमानने वेगळीच कहाणी तयार करण्याचा प्रयत्न केल्याचे तपासात समोर आले आहे. घरात अज्ञात व्यक्ती घुसली आणि त्याने वडिलांवर गोळीबार केल्याचा बनाव करण्याचा त्याचा प्रयत्न होता. मात्र, पोलिसांनी चौकशीची दिशा बदलून तपास सुरू केल्यानंतर त्याच्या जबाबातील विसंगती समोर आल्या. त्यानंतर पोलिसांनी अरमानला ताब्यात घेतले.

पोलिसांच्या म्हणण्यानुसार, एवढी गंभीर घटना घडल्यानंतरही अरमानच्या चेहऱ्यावर पश्चात्तापाची भावना दिसून आली नाही. या प्रकरणाचा सध्या सखोल तपास सुरू असून हत्येमागील संपूर्ण घटनाक्रम आणि इतर बाबींची माहिती पोलिसांकडून घेतली जात आहे.

अरमानच्या पूर्वीच्या पार्श्वभूमीची चौकशी करताना पोलिसांना त्याच्याविरोधातील आणखी एका गंभीर प्रकरणाची माहिती मिळाली. याच वर्षाच्या सुरुवातीला मनिमाजरा परिसरात मित्राची महिंद्रा थार चालवत असताना त्याच्या वाहनाची दुचाकीला धडक झाली होती. या अपघातात दुचाकीवरील दोन्ही व्यक्तींचा मृत्यू झाला होता. या प्रकरणात अरमानला अटक करण्यात आली होती. मात्र, त्यानंतर न्यायालयाने त्याला जामीन मंजूर केला होता.

अपघाताच्या प्रकरणात जामिनावर बाहेर आल्यानंतर काही दिवसांतच अरमानवर स्वतःच्या वडिलांच्या हत्येचा आरोप झाल्याने या प्रकरणाकडे पोलिसांकडून गांभीर्याने पाहिले जात आहे. चंदिगढ पोलीस आता दोन्ही घटनांची पार्श्वभूमी तपासत असून, त्यांच्यातील संभाव्य संबंधांसह हत्येच्या प्रकरणातील सर्व बाबींचा तपास सुरू आहे.