ऑक्टोबरमध्ये फिरायचंय? मग ही ठिकाणं चुकवू नका!

planning-a-trip-in-october ऑक्टोबर महिना प्रवासासाठी अनुकूल मानला जातो. या काळात पावसाचा जोर कमी झालेला असतो आणि वातावरणात हलका गारवा जाणवू लागतो. यंदा २ ऑक्टोबर आणि दसऱ्याच्या सुट्ट्यांमुळे लाँग वीकेंडचा फायदा घेता येणार आहे. त्यामुळे ३ ते ५ दिवसांच्या कालावधीत देशातील काही सुंदर पर्यटनस्थळांना भेट देण्याचे नियोजन करता येऊ शकते.

 

 

मध्य प्रदेशातील पचमढी हे यासाठी एक चांगले ठिकाण ठरू शकते. पावसानंतरचा हिरवागार निसर्ग आणि शांत वातावरण पर्यटकांना आकर्षित करते. येथे धबधबे, गुहा, मंदिरे आणि दऱ्या पाहता येतात. बी फॉल्स, धूपगड, जटाशंकर लेणी, रजत प्रपात आणि अप्सरा विहार ही येथील प्रमुख आकर्षणे आहेत. पचमढीसोबत धुवांधार भेदाघाटलाही भेट देता येते.

 

उत्तराखंडमधील नैनिताललाही ऑक्टोबरमध्ये भेट देता येते. पावसाळा संपल्यानंतर येथील हवामान आल्हाददायक होते. तलावाच्या परिसरात वेळ घालवण्यासोबतच डोंगराळ वातावरणाचा आनंद घेता येतो. दिल्ली-एनसीआरमधून तीन दिवसांत नैनितालची सहल करण्याचे नियोजन करता येऊ शकते. राजस्थानमधील जैसलमेर हादेखील लाँग वीकेंडसाठी पर्याय ठरू शकतो. येथील किल्ले, वाळवंट आणि राजस्थानी संस्कृती पर्यटकांचे लक्ष वेधून घेतात. उंट सफारी, लोकसंगीत आणि राजस्थानी खाद्यपदार्थांचा आनंद घेता येतो. ऑक्टोबरमध्ये उन्हाचा तडाखाही तुलनेने कमी जाणवतो.

 

उत्तर प्रदेशातील आग्र्याला भेट देण्यासाठीही हा कालावधी निवडता येईल. ताजमहालासोबत आग्रा किल्ला आणि फतेहपूर सिक्री पाहता येते. दिल्ली-एनसीआरमधून एक ते दोन दिवसांत आग्र्याची सहल करता येऊ शकते. इतिहास आणि वास्तुकलेची आवड असणाऱ्यांसाठी हे ठिकाण विशेष आकर्षण ठरू शकते. पंजाबमधील अमृतसर हादेखील ऑक्टोबरच्या लाँग वीकेंडसाठी पर्याय आहे. सुवर्ण मंदिरासोबत जालियनवाला बाग आणि वाघा सीमेलाही भेट देता येते. या काळात येथील वातावरणात फारशी उष्णता जाणवत नसल्याने प्रवासाचा आनंद घेता येऊ शकतो.