संत प्रेमानंदांच्या शिष्याच्या मृत्यूने खळबळ!

The death of Saint Premanand's disciple मथुरा येथील संत प्रेमानंद महाराजांचे शिष्य रसिक दुलारी शरण उर्फ दीपक लोढा यांच्या आत्महत्येच्या घटनेने अनेक प्रश्न उपस्थित केले आहेत. पोलिसांनी परिसरातील CCTV फुटेज तपासल्यानंतर घटनेपूर्वीच्या 11 मिनिटांतील हालचाली समोर आल्या आहेत. तपासानुसार, दीपक यांनी खोलीत टाइल्स कापण्यासाठी वापरल्या जाणाऱ्या ग्राइंडरच्या साहाय्याने स्वतःचे गुप्तांग कापल्याचे दिसून आले. त्यानंतर रक्ताने माखलेले कपडे घालून ते काही वेळ खोलीबाहेर फिरले आणि नंतर इमारतीच्या चौथ्या मजल्यावरील छतावर गेले. सकाळी 10.36 वाजता त्यांनी छतावरून उडी घेतली. या घटनेपूर्वी सकाळी 10.25 वाजता ते खोलीतून बाहेर पडताना CCTVमध्ये दिसत आहेत. छतावर गेल्यानंतर काही वेळ ते बसले आणि त्यानंतर सुमारे 10 सेकंद जमिनीवर झोपल्याचेही फुटेजमध्ये दिसते. याचदरम्यान खालील रस्त्यावरून एक महिला जात होती; ती या घटनेत थोडक्यात बचावली.

 

 

 

 

मध्य प्रदेशातील जबलपूर येथील नर्मदा बस्ती फरहदुली येथील रहिवासी दीपक लोढा सुमारे दोन वर्षांपूर्वी वृंदावन येथे आले होते. त्यानंतर त्यांनी संत प्रेमानंद महाराजांकडून दीक्षा घेत आपले नाव रसिक दुलारी शरण असे ठेवले. ते वृंदावनमध्ये साधू जीवन जगत होते. संत प्रेमानंद यांच्या श्रीराधा केलिकुंज आश्रमापासून काही अंतरावर असलेल्या राधावाटिका गल्लीत गुरुकृपा कुंज या चार मजली अपार्टमेंटमध्ये ते युगल नेही शरण यांच्यासोबत राहत होते. शुक्रवारी सकाळी साडेदहा वाजण्याच्या सुमारास ही घटना घडली. घटनेनंतर अपार्टमेंटमध्ये राहणाऱ्या अन्य साधकांनी त्यांची खोली बाहेरून बंद केली. दुपारी दोननंतर पोलिस घटनास्थळी पोहोचले आणि खोली उघडण्यात आली. त्यावेळी खोलीत मोबाईलवर भजन सुरू असल्याचे आढळले. पोलिसांनी युगल नेही शरण यांचीही चौकशी केली. त्यांनी सकाळीच लवकर अपार्टमेंटमधून बाहेर गेल्याचे सांगितले.

रसिक दुलारी शरण हे अपार्टमेंटमधील इतर रहिवाशांशी तसेच कुटुंबीयांशी फार कमी संपर्कात होते, अशी माहिती समोर आली आहे. त्यांच्या भावाने दिलेल्या माहितीनुसार, मागील एक वर्षापासून त्यांचा कुटुंबीयांशी संपर्क नव्हता. कुटुंबीयांनी दोन वेळा आश्रमात जाऊन रसिक दुलारी यांची भेट घेण्याचा प्रयत्न केला, मात्र त्यांना भेटू देण्यात आले नाही, असा दावा भाऊ मनीष यांनी पोलिसांना दिलेल्या प्रार्थना पत्रात केला आहे. मथुरेतील केशीघाट येथे सायंकाळी पाच वाजता मृतदेहावर अंत्यसंस्कार करण्यात आले असून भाऊ मनीष यांनी मुखाग्नी दिला. दरम्यान, या मृत्यूमागील नेमके कारण अद्याप स्पष्ट झालेले नाही. एसपी सिटी राजीव कुमार सिंह यांनी गुप्तांग कापल्याची बाब गंभीर असून या प्रकरणातील प्रत्येक शक्यतेचा तपास केला जात असल्याचे सांगितले आहे. मृताच्या मोबाईलची सीडीआरही तपासासाठी मागवण्यात आली आहे.