चोरीच्या चांदीचा थरारक पर्दाफाश

Kanpur Theft Case उत्तर प्रदेशातील कानपूर येथे चोरीच्या प्रकरणाचा तपास करत असताना फीलखाना पोलिसांच्या हाती मोठी रोकडऐवजी तब्बल 24.348 किलो चांदीचा साठा लागला आहे. पोलिसांनी एका संशयित आरोपीला अटक केल्यानंतर त्याच्या चौकशीतून नानाराव पार्कच्या जमिनीत पुरून ठेवलेल्या चांदीच्या 22 छोट्या-मोठ्या सिल्ल्या जप्त केल्या. चोरीनंतर ही चांदी सुरक्षित ठिकाणी लपवण्यासाठी आरोपीने पार्कमध्ये जमीन खोदून ती पुरल्याचे पोलिसांचे म्हणणे आहे.

 

 

फीलखाना पोलिसांच्या माहितीनुसार, अटक करण्यात आलेल्या आरोपीचे नाव सुधांशु अग्रवाल असे असून तो महेश अग्रवाल यांचा मुलगा आहे. तो फीलखाना येथील 28/18 या पत्त्यावर राहतो. त्याचे वय सुमारे 26 वर्षे आहे. या प्रकरणी फीलखाना पोलीस ठाण्यात गुन्हा क्रमांक 62/2026 दाखल असून भारतीय न्याय संहितेच्या (BNS) कलम 305 अंतर्गत गुन्हा नोंदवण्यात आला होता. या गुन्ह्यापासून पोलिस त्याचा शोध घेत होते.

चोरीच्या घटनेनंतर पोलिसांनी परिसरातील सीसीटीव्ही फुटेज तपासले असता त्यात संशयित चोर दिसून आला. त्यानंतर पोलिस त्याच्या घरी पोहोचले असता तो तेथून पसार झाला. पुढे त्याने न्यायालयात आत्मसमर्पणासाठी अर्ज दाखल केला होता. दरम्यान, 27 आणि 28 सप्टेंबरच्या रात्री सर्व्हिलन्स पथकाला आरोपीबाबत माहिती मिळाली. या माहितीच्या आधारे फीलखाना पोलीस आणि सर्व्हिलन्स पथकाने फूलमंडी परिसरात घेराबंदी केली. यावेळी सुधांशु अग्रवाल याला ताब्यात घेण्यात आले.

अटकेनंतर पोलिसांनी त्याची चोरीच्या प्रकरणासंदर्भात कसून चौकशी केली. चौकशीदरम्यान त्याने चोरी केलेली चांदी नानाराव पार्कमध्ये लपवून ठेवल्याची माहिती दिल्याचे पोलिसांनी सांगितले. त्यानंतर पोलीस पथक आरोपीला घेऊन पार्कमध्ये पोहोचले. त्याने दाखवलेल्या ठिकाणी जमिनीत खोदकाम करण्यात आले. यावेळी जमिनीखाली लपवून ठेवलेल्या चांदीच्या सिल्ल्या पोलिसांच्या हाती लागल्या.

पोलिसांच्या म्हणण्यानुसार, जप्त करण्यात आलेल्या चांदीचे एकूण वजन 24.348 किलो असून ती 22 छोट्या-मोठ्या सिल्ल्यांच्या स्वरूपात होती. चांदी ताब्यात घेतल्यानंतर पोलिसांनी पुढील तपास सुरू केला आहे. चोरीच्या संपूर्ण घटनेत सुधांशु अग्रवालची नेमकी भूमिका काय होती, तसेच या गुन्ह्यात त्याच्यासोबत आणखी कोणी सहभागी होते का, याचा तपास आता पोलिसांकडून केला जात आहे.

दरम्यान, उत्तर प्रदेशातील मुजफ्फरनगर येथेही चोरीची अशीच एक घटना समोर आली होती. बँक ऑफ बडोदाच्या ग्राहक सेवा केंद्रात दोन चोरट्यांनी लाखो रुपयांची रोकड लंपास केली होती. या घटनेपूर्वी चोरट्यांनी दिवसा केंद्राची रेकी केली होती आणि त्यानंतर रात्री लाकडी भिंत तोडून त्यांनी आत प्रवेश करत चोरी केली होती.