महिला पत्रकाराला दिला कथित धमकीचा इशारा?

Outrage over Khawaja Asif's video न्यूयॉर्कमध्ये संयुक्त राष्ट्र महासभेच्या पार्श्वभूमीवर पाकिस्तानचे संरक्षण मंत्री ख्वाजा आसिफ यांचा एक व्हिडिओ सोशल मीडियावर चर्चेचा विषय ठरला आहे. या व्हिडिओमध्ये एका अफगाण महिला पत्रकाराने तालिबान आणि अफगाण महिलांच्या हक्कांबाबत पाकिस्तानची भूमिका जाणून घेण्याचा प्रयत्न केला. मात्र, तिच्या प्रश्नाला ख्वाजा आसिफ यांनी दिलेल्या कथित प्रतिक्रियेवरून सोशल मीडियावर मोठी चर्चा सुरू झाली आहे.अफगाण महिला पत्रकाराने पाकिस्तान तालिबानशी अफगाण महिलांच्या अधिकारांच्या मुद्द्यावर काय भूमिका मांडतो, असा प्रश्न केला. तसेच अफगाण महिलांच्या हक्कांबाबत तालिबानने आपली धोरणे बदलावी यासाठी पाकिस्तानकडून दबाव आणला जाणार आहे का, अशीही विचारणा तिने केली. यासोबतच पाकिस्तान तालिबानला मित्र मानत असताना त्यांच्या महिलांसंबंधी धोरणांना पूर्वी विरोध का केला नाही, असा सवालही पत्रकाराने उपस्थित केला.

 

 

 

 

व्हिडिओमध्ये प्रश्न ऐकल्यानंतर ख्वाजा आसिफ यांनी पत्रकाराला मध्येच थांबवल्याचे दिसते. त्यानंतर त्यांनी तिच्या कपड्यांकडे इशारा करत अशा प्रकारे अफगाणिस्तानला परत जाऊ नकोस, असे म्हटल्याचे दिसत आहे. पुढे त्यांनी हात गळ्याजवळ नेऊन इशारा केल्याचेही व्हिडिओमध्ये दिसते. सोशल मीडिया वापरकर्त्यांनी या हावभावाचा अर्थ अफगाणिस्तानात परतल्यास जीवाला धोका होऊ शकतो, असा घेतला आहे. यावेळी त्यांच्या आसपास असलेले काही लोक हसतानाही दिसत असल्याचा दावा करण्यात आला आहे.व्हिडिओ समोर आल्यानंतर सोशल मीडिया वापरकर्त्यांकडून ख्वाजा आसिफ यांच्या वर्तनावर प्रश्न उपस्थित केले जात आहेत. एका वापरकर्त्याने हा व्हिडिओ शेअर करताना अफगाण महिला पत्रकाराने पाकिस्तान-तालिबान संबंध, तालिबानकडून अफगाण महिलांशी केली जाणारी वागणूक आणि पाकिस्तानच्या भूमिकेबाबत योग्य प्रश्न विचारल्याचे म्हटले. मात्र, त्याला ‘परत जाऊ नका’ असे सांगत गळ्यावर हात फिरवण्याचा इशारा देण्यात आल्याचा दावा या पोस्टमध्ये करण्यात आला.

 

 

 

महिला पत्रकाराने उपस्थित केलेल्या गंभीर प्रश्नाला अशा पद्धतीने उत्तर देणे योग्य आहे का, असा सवालही सोशल मीडियावर करण्यात आला आहे. महिलांच्या हक्कांबाबत प्रश्न विचारणाऱ्या पत्रकाराला धमकीवजा इशारा देण्याऐवजी तिच्या प्रश्नाला स्पष्ट आणि गंभीर उत्तर मिळायला हवे होते, अशी प्रतिक्रिया काही वापरकर्त्यांनी व्यक्त केली आहे.दरम्यान, पाकिस्तान आणि अफगाणिस्तान यांच्यातील संबंधांमध्ये सध्या तणाव कायम असल्याचे या वृत्तात नमूद करण्यात आले आहे. दोन्ही देशांमधील सीमावाद आणि लष्करी कारवायांमुळे परिस्थिती अधिक गुंतागुंतीची झाली आहे. पाकिस्तानने गुरुवारी अफगाणिस्तानातील १० ठिकाणांवर हवाई हल्ले आणि ड्रोन हल्ले केल्याचे वृत्त आहे. अफगाणिस्तानातून झालेल्या ड्रोन हल्ल्यांना प्रत्युत्तर म्हणून ही कारवाई करण्यात आल्याचा पाकिस्तानचा दावा आहे.